الأوراق المطلوبة لسفارة دولة شنجن أو أي دولة أجنبية وإزاي تعملها بنفسك؟؟
أصدقائي الأعزاء ... أتكلمنا قبل كدا عن أهم الأوراق المطلوبة للتقديم لسفارات الدول الأجنبية: أوروبا (شنجن)، الولايات المتحدة الأمريكية، كندا، استراليا، المملكة المتحدة (إنجلترا) وغيرهم.
وأتكلمنا عن أهمية الخطوات الأولي في تجهيز أوراق الملف اللي هيتقدم للسفارة، وإزاي تعمل كل الأوراق بنفسك وتكون جاهز للتقديم في أي دولة أجنبية وتبقي فرص نجاحك عالية.
متزهقش لو المقالات طويلة وشرحها بالتفصيل، إن كان عندك خلفية عن المعلومات دي قبل كدا، أقدر أؤكد لك أنك لو كملت قراءة للآخر أكيد هتلاقي ولو معلومة واحدة تفيدك، واحنا بنراعي الشرح المطول علشان أغلبية الناس معندهاش معلومات كافية عن المواضيع اللي بنتكلم فيها.
ولو عندك أي استفسار أو محتاج توضيح أكتر لأي موضوع أو أي نقطة أتكلمنا فيها، راسلنا وإنشاء الله هنجاوبك في أسرع وقت.
ولو كنت أستفدت ولو بمعلومة واحدة بس شاركنا برأيك وتعليقك وأتفاعل معانا وكون صديق الصفحة.
أنصحك تقرأ المقالات السابقة هتفيدك كتير إنشاء الله:-
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
هنتكلم في موضعنا اليوم عن بقية الأوراق المطلوبة علشان ورقك الشخصي يكون جاهز جداً في الشروط الأساسية لأي سفارة تقدم فيها، وهنتكلم عن كل ورقة مطلوبة بالتفصيل (حجز الفندق والطيران والتأمين الصحي الدولي وشركاته المعتمدي لدي السفارات).
وهنتكلم كمان في المواضيع الجاية عن طريقة حجز المواعيد في معظم السفارات، وإزاي تعمل دعوة قوية بنفسك، وإزاي يبقي معاك برنامج سياحي أنت اللي عامله وفاهم كل كلمة فيه، وكمان هتعرف معانا إزاي تملء الأبلكيشن بنفسك.
وهنتكلم كمان في المواضيع الجاية عن طريقة حجز المواعيد في معظم السفارات، وإزاي تعمل دعوة قوية بنفسك، وإزاي يبقي معاك برنامج سياحي أنت اللي عامله وفاهم كل كلمة فيه، وكمان هتعرف معانا إزاي تملء الأبلكيشن بنفسك.
تعتبر الأوراق المطلوبة للسفارات الأجنبية كلها نفس الشيء، ما عدا اختلافات بسيطة هنتكلم فيها إنشاء الله، وهي:
- كشف حساب بنكي لآخر 6 شهور فاتت (يفضل يكون مختوم من البنك المركزي).
- لو أنت موظف، خطاب جهة عمل، برنت تأمينات، صورة من عقد العمل اللي بينك وبين الشركة (ناس كتير بتتفاجئ من الطلب دا وهما جوة السفارة أو مكتب التقديمات التابع للسفارة)، صورة من السجل التجاري والبطاقة الضريبية للشركة أو المنشأة (مش كل السفارات بتطلبه لكن لازم يكون موجود احتياطي ممكن ينطلب منك).
- في حالة أن رصيد الحساب البنكي غير كافي لتغطية نفقات السفر المفترضة، ممكن تستعين بشخص عنده كشف حساب زي أحد الوالدين أو الأخوة أو أي شخص آخر مع تحديد هويته وصلته بالنسبة ليك ويكون عامل تفويض ليك بسحب نفقات السفر كاملة وموقع من البنك.
- لو أنت صاحب نشاط أو صاحب عمل، السجل التجاري والبطاقة الضريبية (تكون مصورهم ومعاك الأصل)، البطاقة الاستيرادية إن وجد.
- صور شخصية حديثة تختلف حجمها تبع كل سفارة.
- جواز سفر ساري لمدة 6 شهور (علي اعتبار أن تأشيرات السياحة لشنجن علي سبيل المثال مسموحلك زيارة لمدة أقصاها 3 شهور).
- شهادة تحركات من مجمع التحرير.
- وثيقة تأمين سفر (لازم تذكر للشركة اللي هتجيب منها الوثيقة الدولة اللي أنت رايحها).
- حجز فندق وطيران (هنشرح بيتعملوا ازاي وايه الطرق السليمة للحجز مهمة جداً).
- إثبات روابط أسرية واجتماعية وعملية تثبت نيتك للعودة إلي بلدك قبل إنتهاء مدة التأشيرة (برضه نقطة مهمة أوي هنشرحها بالتفصيل).
- بالنسبة للشباب تحت سن 18 سنة، تصديق وتوقيع من إحدى الأبوين أو الشخص المسئول عن من تحت 18 سنة أمام موظف السفارة (أو مكتب التقديمات التابع للسفارة)، أو تسجيل موافقة الوالدين معاً في مصلحة الشهر العقاري، وإحضار صورة وأصل مترجمين لدي مكتب معتمد لدي السفارة، وشهادة ميلاد أيضاً مترجمة ويرفق معهم صور البطاقة الشخصية لكلا الوالدين مترجمين.
- ترجمة جميع الأوراق من مكتب معتمد وموثق لدي السفارة إلي اللغة الإنجليزية أو لغة الدولة المراد السفر إليها.
- الغرض من الزيارة يا صديقي العزيز (دي بقي قصة لوحدها خالص محدش فاهم كل تفاصيلها وخباياها وإزاي تثبت هدفك من زيارة البلد).
- لو جايلك زيارة أو دعوة من قريبك أو صاحبك أو من شركة، لازم ترفق أصل الدعوة من الشخص وصورة هويته وأرقام تليفون عمله وبيته تكون مذكورة في الدعوة (هنكمل بقية التفاصيل في نفس المقالة).
طبعاً الأوراق دي ممكن تبقي لناس صعبة وتقيلة ومش مفهومة، وناس تانية عارفة الأوراق المطلوبة بالظبط ويمكن أخدو خطوة التقديم للسفر لكن محصلش نصيب.
المهم في دا كله دلوقت أنك تقدر تعمل كل الأوراق المطلوبة باحترافية وبخطوات سليمة لو قرأت مقالاتنا كويس، ومش محتاجين نعيد الكلام تاني ونقول أن أصعب الخطوات اتكلمنا عنها وبسطناها بقدر الإمكان، ومش فاضل غير حاجات بسيطة نوضحها علشان يبقي ملفك كامل وسليم 100%.
طيب خلصنا المهنة وخلصنا قصة كشف الحساب البنكي وخطاب جهة العمل، نروح بقي للتقيل أوي وتفاصيل فنية كتير هتفيدك تكمل مشوارك بنجاح إنشاء الله.
أولاً- حجز الفندق:-
طبعاً كل الناس بتدخل علي النت وتجيب مواقع حجوزات الفنادق المشهورة، وبتختار زي ما سيادتك عايز وبعد ما تحدد سعر الفندق المناسب ليك وإلي آخره من الاختيارات بتدخل بالفيزا بتاعتك تكتب رقمها بعد ما بتسجل أسمك وبياناتك وفي الآخر تطلع تطبع صفحات الحجز (هنقولك إزاي تحجز بنفسك من أكتر من موقع وتسجل إزاي علشان توصل لصفحة تم الحجز بنجاح).
دي روابط لمواقع تقدر تحجز منها غرفة في فندق أو غرفة في شقة وغيرها من الاختيارات، وكل واحد بيختار علي أساس المدة اللي هيقضيها والسعر اللي يقدر يتحمله، وهتتفاجئ أن فيه مواقع فيها سكن مجاني (أيوة والله سكن مجاني)، وهتقدر تتواصل مع المالك الأصلي للسكن وتتأكد وتحدد معاه ميعاد سفرك والمدة اللي أنت عايز تقضيها.
وأفهم المعلومة دي كويس أوي: السكن في الدول الأجنبية مش هو الفندق بالأخص، الاختيارات التانية زي غرفة في شقة مع أسرة أو شباب من نفس البلد إللي هتزورها منتشر جداً ومعروف فكل مكان، وكمان مقبول جداً عند السفارات، وعلي عكس كمان ما الناس مفكرة السفارات بتحب النوع دا من السكن ليك لأنه غير مكلف وبيساعدك تتعرف علي ثقافة البلد والاندماج مع أهلها في فترة وجودك في البلد، فأنصحك بالاختيارات دي عن تجارب كتير شخصية وغير شخصية. تعالوا نشوف بالتفصيل مميزات كل اختيار:-
المواقع اللي هنذكرها دي ليها أفضلية قوية جداً عن باقي المواقع المشهورة زي بوكينج أو أجودا وغيرهم، يعني مثلاً في بعض دول زي (تركيا - جورجيا وغيرهم) ممكن تلاقي سرير بداية من 5 دولار في اليوم (اللي هو يعني المفروض 5 جنيه في اليوم)، دا غير أن المواقع دي بتبقي أشمل في نقط معينة هتعرفها لما تجرب (أهمها أنك هتلاقي حد يستضيفك مقابل مثلاً أنك تساعده في ترتيب البيت أو تنظيف الحديقة)، والأهم بتعرضلك حاجة لا يمكن تلاقيها في المواقع السابقة ألا وهي أنك تلاقي سكن مجاني بمعني الكلمة وهنشرح إيه المقابل (المقابل غير مادي).
1- Hostelworld:-
وكلمة (hostel) معناها بيت شباب، أو سكن مناسب للطلاب والشباب، والموقع دا بيضم اختيارات كتير جداً من أنظمة السكن الجماعي أو المشترك، ودايماً المواقع بتشير للسكن الجماعي بكلمة (Dormitory). هتلاقي علي الموقع اختيارات كتيرلأنواع الغرف والشقق اللي تناسب قدرتك علي الدفع وفي نفس الوقت تقدر تحدد وسائل الراحة اللي أنت محتاجها وتدور علي الموقع براحتك زي (وجود خدمة واى فاي، مطبخ مشترك، يتحضرلك فطار أو غذاء أو عشاء أو كله مع بعضه، وجود حديقة، صاحب السكن ممكن يكون عنده سيارة يقدر يوصلك لأي مكان ويعرفك علي أهم وأجمل المناطق في البلد بمبلغ معقول جداً).
هتدخل الموقع بالضغط علي العنوان، هتلاقي الصفحة دي:
هتلاقي مستطيل كبير أكتب فيه اسم البلد إللي أنت رايحها هيفتحلك تحتها كزا اختيار مش مهم تبقي فاهم الاختيارات دي (بتبقي عناوين وأماكن في البلد اللي أنت رايحها)، اختار دايماً أول أختيار. وهتيجي عند المربع اللي مكتوب فيه (CHECK IN)، أكتب في أول خانة ميعاد وصولك البلد، بعدها خانة (CHECK OUT)، هتكتب ميعاد مغادرتك البلد (طبعاً أنت قاعد مش هتمشي بس لازم يكون فيه مواعيد ذهاب وعودة). بعدها هتدخل علي خانة الضيف (GUEST)، هتكتب فيها عدد المسافرين لو معاك حد، ولو لوحدك اختبار رقم 1، وبعدها أضغط علي المستطيل البرتقالي (Let's go).
هتظهر القائمة دي بالاختيارات:-
- كلمة (Filter)، تفتح لك الأسعار كلها وتقدر تختار السعر اللي أنت عايزه، بس سيب الخانة دي زي ما هي، وهتقدر بعد ما تظهر الاختيارات أنك ترتبها علي حسب أرخص سعر، ودا هيبقي من خانة هتلاقيها فوق اسمها (Sort)، ودي اختياراتها تصنيف علي حسب السعر أو الأعلي تقييم أو المكان اللي هتسكن فيه يبقي بعيد أد إيه عن وسط البلد (هتختار السعر)، كل النتايج اللي هتظهرلك مترتبة علي أساس السعر.
- خانة (Room) ، تختار منها نوع السرير، سواء مفرد أو زوجي أو غرفة لوحدك أو مع حد.
- خانة (Type)، بتوضح نوع السكن إللي أنت عايزه سواء كان فندق أو شقة أو سكن جماعي أو غرفة في شقة.
بعد ما ظبطت احتياجاتك المناسبة هتضغط علي كلمة (Search)، هتظهرلك اختيارات كتير شوف الأفضل بالنسبالك من ناحية السعر والبعد عن مركز المدينة.
المكان اللي هيعجبك وتختاره هتلاقي كلمة (View) تحت السعر اضغط عليها، هتظهرلك الشاشة اللي هنحطها دي، وفي الاختيارات هتلاقي خانة بيطلب منك تحدد عدد الغرف.
بعد ما تختار الغرفة، هتنزل لتحت وتضغط (Book Now)، هينقلك علي صفحة تملي فيها بياناتك بالتفصيل، وخلي بالك من كل حرف بتكتبه يبقي زي جواز السفر بالظبط.
متخافش لما ينطلب منك تحط رقم كارد البنك بتاعك وبياناته، أنت كدا كدا مش هيتسحب منك أي مليم، وبتتأكد أكتر من النقطة دي أنك بتختار في خيارات البحث عن مكان الإقامة سواء فندق أو غرفة في شقة بتختار (بدون دفعة مسبقة، إلغاء مجاني). وهتلاقي الموقع تلقائي كل اختيار تدخله هيبقي فيه رسايل تأكد علي المعلومتين دول، حتى في الصفحة النهائية.
لو لسة قلقان ابقي خلي الكارت فاضي (ما أحنا قولنا قبل كدا وأنت بتفتح حساب بنكي هتطلب فيزا مشتريات أونلاين، ونوع الفيزا دا أنت بتحط فيه مبالغ صغيرة علي أد مشترياتك وبس).
بعدها هيجيلك صفحة تمت العملية بنجاح باللون الأخضر، وهيروحلك رابط علي البريد الإلكتروني اللي أنت مسجل بيه. وبكدا يبقي حجزك للفندق أنتهي بنجاح الحمد لله.
2- Hostelbookers:-
دا برضه نفس نوعية الحجز ونفس الشرح. وهتلاقي برضه في بعض الدول أسعار مناسبة جداً للسرير بالنسبة للفرد.
3- Airbnb:-
الموقع دا ي جماعة ميزته أن بيشجع أصحاب الملك في كل بلاد العالم لتدعيم فكرة أستضافة الأجانب وتبادل الثقافات بينهم وتحقيق مصلحة متبادلة بين الطرفين. وميزته كمان بيوصلك بالمالك الأصلي في أغلب الأوقات. وبيشجع أصحاب الملك أنهم يتنافسوا مع بعض في أسعار الغرف والسراير داخل الشقة. هتلاقوا برضه أسعار كويسة وناس محترمة.
طيب أحنا قولنا أن فيه أماكن سكن ببلاش، هي فين؟ حالاً موجودة
4- Couchsurfing:-
الموقع دا ي صديقي ببلاش فعلاً. ببساطة الموقع دا بيضم ناس (أصحاب شقق) مهتمين بتبادل الثقافات مع شعوب تانية، ومن النوع اللي يحبوا يستضيفو أجانب من أي مكان. والموقع دا فيه قسمين: قسم المستضيف (صاحب الشقة) وقسم الزائر (اللي هو سيادتك).
شوفو ي أصدقائي نتيجة البحث عن مكان أنا أختارته كمثال (روما - إيطاليا)، طلع أن فيه 57.468 (سبعة وخمسين ألف وربعمائة ثمانية وستون نتيجة).
وهتلاقي ناس بتتكلم اللغة الإنجليزية كلغة أساسية غير لغة البلد. أنت بس هتتعب شوية وتتواصل مع الشخص اللي أنت هتختاره، وهتدخل تتواصل معاه، ولو كان الشخص مش متواجد علي النت سيبله رسالة، وهكذا راسل كزا واحد ودردش واستخدم ترجمة جوجل وعيش.
تعالو بقي أقدم لكم موقعين لقطة بمعني الكلمة.
5- wwoof:-
الموقع دا يا جماعة خيالي. دا باختصار شديد كدا بيقدملك مكان تسكن وتاكل كمان مقابل أنك تساعدهم في شغلهم. الموقع دا كل اللي فيه عندهم مزارع وحقول ونظام جميل وجو أجمل وعيشة طبيعية. ومساعدتك ليهم هتلاقيها ممتعة وبتبقي وسط عائلات.
أدخل الموقع وأكتب البلد اللي أنت رايحها، هتظهر نتايج بحث عن المكان، دور وشوف روعة النتايج اللي هتظهر.
علي فكرة يا جماعة عايز أقولكم أن فيه ناس راحو وأنبسطو جداً والموضوع مش متعب، وكمان اللي راح سياحة بحق وحقيقي استمتع جداً بالتجربة، واللي رايح أصلاً علشان يشتغل أحب أقولك أنت في المكان المناسب لأن ممكن تحول الموضوع لشغل فعلاً، أو علي الأقل هتلاقي اللي يساعدك تلاقي شغلك. وأكتر من كدا كمان. جرب مش هتخسر...
6- workaway:-
الموقع دا برضه أكتر من رائع .. نفس فكرة الموقع اللي فات بس بيتميز عنه أن نوع مساعدتك لصاحب الملك بتبقي في نشاطات مختلفة مش مزارع وبس. يعني تشكيلة كبيرة من المشروعات سواء متوسطة أو كبيرة، ودي برضه فرصة ليك كويسة تلاقي شغل كويس وتحول المساعدة دي لشغل دايم بمقابل مادي. والناس دي برضه بيخلوك تساعدهم في أمور حياتهم وشغلهم وكل ما تبقي شاطر بتاخد مساحتك كويس أوي. عندك أكتر من أربعين ألف نتيجة بحث علي الموقع دا.
بكدا يبقي خلصنا حجز الفندق خالص وكمان عرضنا أماكن مجانية للإقامة.
شوية معلومات خلي بالك منهم كويس لحجز الفندق:
كل حرف في بياناتك تتأكد منه كويس أوي قبل ما تكتبه.
- ركز في مواعيد الذهاب والعودة علشان تبقي مظبوطة مع خطاب جهة العمل وبرنامج الرحلة.
- خلي بالك من مدة الإجازة اللي بتبقي مكتوبة في خطاب جهة العمل (HR)، لازم يكون تاريخ الرحلة وحجوزات الفندق والطيران والتأمين الصحي الدولي نفس التواريخ بالظبط.
- مثلاً لو خطاب جهة العمل أنت عامل الإجازة 15 يوم، فرضاً من يوم 5/5/2020 ليوم 20/5/2020
- يبقي أنت حجوزاتك كلها هتسيب يومين في الأول ويومين في الآخر، بمعني:
- تاريخ السفر هيبقي 7/5/200 والعودة يوم 18/5/2020.
- طيب ليه؟ علشان المفروض أنك هتجهز نفسك وتقعد في بيتك شوية قبل السفر، وطبعاً لما ترجع من السفر مش هترجع تاني يوم علطول علي الشغل، لازم هتقعدلك يومين علي ما ترجع الشغل.
- عموماً لو فيه ترانزيت في الرحلة، أو رحلتك طويلة خلي بالك من ميعاد الوصول والتوقيت الخاص بالبلد اللي هتزورها.
- فيه حاجة مهمة جداً برضه في حجز الفندق محدش بيتكلم عنها، وهي الطريقة الأصح والمناسبة في كل الأوقات، بعد ما بتختار الفندق بتاعك وعدد الأيام إللي هتقضيها فيه، المفروض أنك بتدفع تمن يوم واحد علشان حجزك يكون مقبول 200%، ويكون ليه وزنه قدام أي سفارة تقدم ليها، لأن السفارات دايماً بتحب الورق إللي مدفوع فيه فلوس ومترتب صح، وكمان بيشوفو جدية كاملة في الشخص اللي عايز ياخد التأشيرة.
- يعني مثلاً أنت هتعمل برنامج السفر بتاعك وليكن (10 أيام)، هتدفع فيه تمن يوم واحد، اليوم اللي بتدفعه دا بيأكدلك حجز المكان فعلاً وحجز الفندق إللي بيتبعتلك بيتكتب فيه أنك دفعت الفلوس، عكس شغل الحجوزات العادية إللي برضه بتديك حجز مؤكد للمدة بتاعتك بدون دفع.
- أكيد فيه ناس لسة هتسأل الفرق إيه؟ وليه ندفع في تأكيد الحجز لما ممكن نجيب نفس الورقة ببلاش، ما هي السفارة مش بتبص علي الحجوزات وبيبقو عارفين أن كلها حجوزات مؤقتة ولما ناخد التأشيرة إنشاء الله هنحجز؟
- موضوع إن السفارة مش بتهتم أو بتبقي فاهمة أن الحجوزات مؤقتة لا يلغي أبداً فكرة أن الحجز المدفوع مميز وبيديك صلاحية أن الفندق بيبعت نسخة من حجزك لسفارة دولته إللي حضرتك هتقدم فيها سواء بفاكس أو بالبريد الإلكتروني، ودا نظام قوي وبيعرف الموظفين في السفارة أن فلان حاجز ودافع، يعني مش زي الباقي حاجز مؤقت من علي موقع إلكتروني، دا غير أن شكل الحجز كشكل خارجي أشيك بكتير وله قيمة.
- نظام حجز الفنادق أو الشقق أو السرير في شقة، كان في وقت من الأوقات، الناس اللي بتبقي واثقة في ورقها جداً ومتأكدة من الحصول علي التأشيرة كانو بيدفعو تمن الفندق بالكامل عن طريق شركة سياحة، وعارفين أن في حالة الرفض لا قدر الله هيخسر تمن ليلة واحدة ويسترجع الباقي. دلوقت أماكن السكن بتقبل أنك تدفع تمن يوم واحد بس بدل ما تدفع المبلغ كله وتيجي تسترد الباقي بعدها بأيام معينة (سهلوا الموضوع وبتدفع إللي هتخسره بس)، وبيبعتولك الحجز مؤكد ومدفوع بالكامل.
لو شايف أن موضوعنا قوي وهتتابع خطواتنا من أول مقالة لآخر مقالة وهتمشي علي الخطوات إللي بنقولها، وقتها مش هتخاف تكلف أي ورق، وخصوصاً أن كل دا هتعمله بنفسك، وإن لجأت لحد يساعدك هتبقي أنت إللي بتوجهه وفاهم كل خطوة.
ثانياً- حجز تذكرة الطيران والتأمين الصحي الدولي:-
حجز تذكرة طيران مؤقتة (مفيش حاجة أسمها وهمية)، هو حاجة مقبولة جداً للسفارات، لأنهم فاهمين وعارفين أن مينفعش شخص يحجز تذكرة طيران مدفوعة، ويجي لا قدر الله يترفض ميقدرش يسترد المبلغ المدفوع أو في أفضل الأحوال يخسر فلوس مش قليلة ويسترجع الباقي، ويبقي أترفض وكمان ياخد وقت علي ما يسترد المبلغ إللي هيرجعله.
علشان كدا الحل الأمثل والأضمن أنك تروح لشركة كويسة تعملك حجز الطيران بطريقتهم، بيبقي عندهم سيستم خاص بيهم يقدرو يحجزولك تذكرة طيران مؤقتة بتواريخ ورقم رحلة حقيقي وكمان رقم خاص بيبقي علي التذكرة لمراجعة الحجز.
طيب أشمعني دي اللي هنشتريها من برة ومنعرفش نعملها؟؟
أغلب خطوط الطيران المعروفة هتاخد وقت كتير أوي علي النت وعلي المواقع بتاعتهم علشان تسجل بياناتك لتذكرة طيران مؤقتة وبتختار (الدفع لاحقاً)، لكن الطريقة دي مش طول الوقت بتنفع، وساعات متفتحش معاك.
دا غير أن أنت كدا كدا لازم هتلجأ لشركة حجز تذاكر طيران علشان تعمل التأمين الصحي الدولي، وهتلاقي المبلغ اللي هتدفعه بسيط لأنك بتدفع تمن التأمين الصحي الدولي.
ودي شركات التأمين الصحي الدولي المعتمدة والموثوق فيها لدي السفارات (بتقول لموظف شركة حجز الطيران يسجلك التأمين بتاعك علي شركة منهم):-
علشان كدا الحل الأمثل والأضمن أنك تروح لشركة كويسة تعملك حجز الطيران بطريقتهم، بيبقي عندهم سيستم خاص بيهم يقدرو يحجزولك تذكرة طيران مؤقتة بتواريخ ورقم رحلة حقيقي وكمان رقم خاص بيبقي علي التذكرة لمراجعة الحجز.
طيب أشمعني دي اللي هنشتريها من برة ومنعرفش نعملها؟؟
أغلب خطوط الطيران المعروفة هتاخد وقت كتير أوي علي النت وعلي المواقع بتاعتهم علشان تسجل بياناتك لتذكرة طيران مؤقتة وبتختار (الدفع لاحقاً)، لكن الطريقة دي مش طول الوقت بتنفع، وساعات متفتحش معاك.
دا غير أن أنت كدا كدا لازم هتلجأ لشركة حجز تذاكر طيران علشان تعمل التأمين الصحي الدولي، وهتلاقي المبلغ اللي هتدفعه بسيط لأنك بتدفع تمن التأمين الصحي الدولي.
ودي شركات التأمين الصحي الدولي المعتمدة والموثوق فيها لدي السفارات (بتقول لموظف شركة حجز الطيران يسجلك التأمين بتاعك علي شركة منهم):-
- شركة مصر للتأمين.
- شركة دلتا للتأمين.
- شركة المصرية السعودية للتأمين.
- شركة وثائق للتأمين التكافلي.
- شركة النيل العامة للتكافل.
- قناة السويس للتأمين.
فيه شركات أكتر بسدي أكتر الشركات المعروفة وهتلاقيها بسهولة في أي شركة حجز طيران.
هيبقي فاضل يا أصدقائي نتكلم في الموضوعات الجاية عن: (طريقة حجز ميعاد لمعظم السفارات - إزاي نملي الأبلكيشن بنفسنا - هنحتاج إيه غير الأوراق إللي أتكلمنا عنها - إزاي جيب دعوة كويسة ومضمونة بنفسك - إلي آخره وأكتر إنشاء الله).
بكدا أصدقائي الأعزاء نكون كملنا موضوعنا وأتكلمنا في مقالاتنا لحد دلوقت عن:
دا غير موضوعنا انهاردة إللي اتكلمنا فيه عن أهم الملاحظات والنصايح لحجز فندق وطيران وتأمين صحي دولي. وبكدا كشخص عايز تسافر تكون السيرة الذاتية بتاعتك مكتملة.
لو لقيت مواضيعنا فيها أي أستفادة ليك شاركنا برأيك وأتفاعل معانا في التعليقات والمشاركات ولو عندك أسئلة أو موضوع عايزنا نتكلم فيه راسلنا فوراً علشان نقدر نستمر ونلاقي أن مجهودنا بيوصل لناس تستفيد منه فعلاً. شكراً لمتابعتكم
لو لقيت مواضيعنا فيها أي أستفادة ليك شاركنا برأيك وأتفاعل معانا في التعليقات والمشاركات ولو عندك أسئلة أو موضوع عايزنا نتكلم فيه راسلنا فوراً علشان نقدر نستمر ونلاقي أن مجهودنا بيوصل لناس تستفيد منه فعلاً. شكراً لمتابعتكم
ليست هناك تعليقات:
إرسال تعليق