طرق السفر إلي أوروبا بالنسبة للمصريين
أصدقائي الأعزاء هنتكلم في موضوع اليوم عن السفر إلي أوروبا بطريقة شرعية وسليمة، وإزاي تعمل دعوة سياحية أو برنامج سياحي لإحدى الدول الأوروبية إللي أنت عايز تاخد تأشيرتها بدون الذهاب إلي (مكاتب استخراج فيزا شنجن للمصريين)، أو ما يسمي فيزا شنجن معروضة للبيع في مصر، وإلي آخره من الكلام.
وأتكلمنا في الموضوعات السابقة بالتفصيل عن تعمل إيه علشان تبقي جاهز أنك تقدم ملفك لسفارة الدولة إللي أنت بتحلم تسافر ليها، وتجهيزات ملفك كامل (إزاي تعمل مهنة كويسة ومناسبة علي بطاقة الرقم القومي وجواز السفر - إزاي تستخرج برنت تأمينات اجتماعية وخطاب جهة العمل - إزاي تستخرج سجل تجارى وبطاقة ضريبية - إزاي تعمل كشف حساب بنكي محترم)، كل المواضيع دي هسيبلك الروابط بتاعتها في آخر المقالة إنشاء الله.
هنشرح في المقالة دي إنشاء الله كل شيء بالتفصيل عن الدعوات السياحية والبرامج السياحية لأي دولة، وإزاي تقدر تجهزها والمواقع إللي تقدر تدخلها تعمل برنامج سياحي مجاني والمواقع إللي ممكن تدخلها تعمل دعوة بزنس لأي دولة.
برنامج زيارة سياحية أو دعوة زيارة سياحية أو زيارة بزنس:-
برنامج الزيارة السياحي، هو عبارة عن دليل أو خطة أنت بتعملها داخل الدولة إللي أنت عايز تسافر ليها، وبتذكر طبعاً أفضل الأماكن وأشهرها في البلد دي، إللي هي بتعتبر مناطق جذب سياحي، وبيزورها ناس كتير من دول مختلفة حول العالم.
وبتبقي محدد الأماكن دي علي حسب مدة رحلتك للبلد، وبتكتب بالتفصيل كل يوم في الرحلة أنت مخطط تزور كام مكان وبتذكر الأماكن دي وبتقدم نبذة صغيرة عنها (طبعاً احنا فاهمين أنك مش مسافر بغرض السياحة لكن ورقك لازم يكون مترتب كدا). وأنت بتشرح كلمات بسيطة عن كل مكان هتحتاج تكتب عنوان المكان ووإزاي أنت ناوي توصله (بالسيارة - مشي - الأتوبيس - إلي آخره من وسائل النقل علي حسب مكان المنطقة)، وطبعاً الاختيارات دي بتبقي علي حسب المكان إللي أنت هتزوره بعيد بمسافة أد إيه عن الفندق أو مكان السكن بتاعك.
بالنسبة لدعوة الزيارة السياحية، هي دعوة موثقة من حكومة البلد إللي أنت رايحها، وبتبقي مبعوتة ليك من شخص عايش هناك بطريقة شرعية (معاه إقامة)، سواء كان صديق أو أحد الأقارب، أو أياً كان وجه الصلة بينكم.
والطريقة دي بتحتاج من الشخص إللي هيبعتلك دعوة الزيارة أن يذكر في الدعوة إنه متكفل بإقامتك طوال فترة الزيارة، وإنه علي مسئوليته الشخصية، وإلي آخره من الكلام.
طيب إيه الفرق بين برنامج الزيارة السياحي، وبين دعوة الزيارة السياحية؟؟
الفرق أن البرنامج السياحي أنت ممكن تعمله بكل سهولة (هقولك علي مواقع تقدر تجهز منها البرنامج السياحي بتاعك)، ومش هتحتاج مساعدة حد.
الدعوة السياحية، لازم تكون مرسلة من شخص في الدولة إللي أنت عايز تاخد تأشيرتها، ولازم يكون مستوفي بيانات وإجراءات كتير علشان يبعتلك دعوة مظبوطة مقبولة للسفارة، وكمان لازم الدعوة دي تكون موثقة من الجهات المختصة في الدولة.
بالنسبة للدعوة البزنس، دا عبارة عن دعوة لمعرض أو حدث كبير في دولة ما لبيع منتجات وآلات مختلفة، وبيحضره آلاف من أصحاب المصانع والشركات الكبيرة والمتوسطة لعرض منتجاتهم أياً كانت، حسب تصنيف ونوع المعرض، إذا كان في مجال واحد أو عدة مجالات.
وكمان بيحضر النوع دا من المعارض مديرين تسويق ومبيعات، وناس مختصة بالمجال لشرح طبيعة المنتج، وبيحضره مشتريين وناس كتير من مختلف الدول بمختلف وظائفهم. والنوع دا من الدعوات أوقات بيبقي مجاني وليه مواقع تقدر تسجل فيها وتحصل علي الكتيب أو الدعوة إللي تحضر بيها، ودي بتبقي إلكترونية وبتقدر تحصل عليها بعد التسجيل في الموقع عن طريق البريد الإلكتروني (هنتكلم عن المواقع دي في نفس الموضوع).
أهمية وجود البرنامج السياحي في ملف السفارة:-
- البرنامج السياحي بيعبر عن استغلالك للوقت ومدة الرحلة السياحية بتاعتك في البلد، وبيوصف فكرتك عن البلد إللي أنت رايحها وهل عندك دراية بالمعالم السياحية إللي فيها.
- بيدل لموظفي السفارة أنك علي دراية كاملة بالأماكن المشهورة في بلده وذات جذب سياحي لمختلف الأشخاص في العالم وعارف أنت رايح فين بالظبط.
- النوع دا من البرامج بيبقي فيه المجاني والمدفوع، والنوع المدفوع بيبقي مفضل أكتر لدي السفارة.
- النوع المدفوع زي مثلاً أنت رايح دولة فيها متاحف أو أماكن أثرية أو مدن ملاهي كبيرة، أو كل دا مع بعضه، فبيبقي ليها أشتراك دخول (حاجة رمزية).
- ونوع كمان مدفوع، عن طريق الوكالات السياحية في البلد إللي هتزورها، بيبقو مجهزين برامج قوية وممتعة، وأسعار معقولة.
- البرنامج السياحي عامة بيوضح ترتيب أفكارك، وإذا كنت فعلاً مهتم بمعالم البلد ولا هي وسيلة دخول وخلاص وطريقة عرضك للأماكن السياحية دي (علشان كدا النوع المدفوع بيقوي جداً فرصة حصولك علي التأشيرة).
أهم المواقع إللي تقدر تعملنا برنامج سياحي محترم، وإزاي نتعامل معاها:
- موقع انسبيروك (Inspirock). هتضغط علي الكلمة الإنجليزي بداخل القوس، هتلاقي واجهة الموقع هتلاقي مربع مكتوب عليه (مخطط الرحلة) أو (Itinerary Planner)، تحته مستطيل تكتب فيه البلد أو عاصمة البلد إللي أنت عايز تروحها (يفضل تكتب أسم المدينة إللي فيها معالم سياحية كتير ومنطقة جذب سياحي للأشخاص حول العالم). بعدها هتلاقي مستطيل تكتب فيه تاريخ الذهاب والعودة، وجنبه مباشرة عدد الأشخاص. بعدها هتلاقي تفضيلات بحث اضغط السهم هتلاقي اختيارات حط علامة علي (Relaxing)، و (Outdoors)، و (Shopping)، و (Beaches). الاختيارات دي معناها أنك عايز أماكن للزيارة صفاتها تسوق وشواطئ واسترخاء وأماكن في الهواء الطلق. (دا أسهل موقع تشتغل عليه)، عيبه الوحيد أنك ممكن متعرفش تحفظ برنامج الرحلة إللي أخترته علي الكمبيوتر، لكن بيتحفظ من خلال البريد الإلكتروني وكمان الموقع بيحفظ كل رحلة أنت بتخططها، يعني ممكن تقفل الموقع عادي وتفتحه من المكان إللي هتطبع فيه البرنامج.
- موقع (Googletrips)، هتدخل تلاقي عروض كتير، وأهم الأماكن إللي ممكن تزورها في الدولة وليها برنامج متكامل تقدر تحدد المدد الزمنية إللي هتسافر وترجع فيها وتختار برنامج سياحي منهم وتطبعه.
- موقع (Livetrekker)، وهو موقع شغال بنفس الطرق السابقة.
- موقع (Roughguides)، هتدخل علي الرابط وتضغط تخطيط وحجز برنامج رحلة أو باللغة الإنجليزية (Plan & book my trip).
- فيه مواقع أكتر من كدا كمان، وعلشان أسهل عليك، ممكن تبحث أكتر وأكتر باستخدام كلمة (Itinerary) واسم البلد إللي عايز تزورها.
أهم العناصر إللي تتوفر في تخطيط البرنامج السياحي:-
- تخلي بالك من موضوع مواعيد الذهاب والعودة كويس أوي.
- تخلي بالك كويس أوي من بياناتك إللي بتكتبها وتراجعها كزا مرة.
- يفضل تعمل البرنامج السياحي الأول وبعدها تعمل حجز ميعاد السفارة وباقي الحجوزات زي حجز الفندق والطيران والتأمين الصحي الدولي.
- خلي بالك وأنت بتعمل حجز الطيران من وقت الوصول للبلد إللي هتسافرها لأن دا مرتبط بميعاد دخولك الفندق وبداية البرنامج السياحي.
- بمعني: ممكن شركة حجز الطيران تختارلك ميعاد طيران يكون وصولك فيه للبلد هناك (بتوقيتهم) أبتدأ يوم جديد غير إللي سافرت فيه، وبناء عليه هيبقي يوم دخولك الفندق مش هو اليوم إللي سيادتك سافرت فيه، ولكن هيكون بتاريخ تاني يوم لأن الساعة هتكون عندهم عدت 12 مساء ودا بداية يوم جديد.
- راجع البرنامج السياحي بتاعك قبل ما تحفظه علي الموقع، لأن أوقات كتير بيبقي حاطط مطاعم تاكل فيها وأماكن تشتري منها البقالة واحتياجات الأكل المنزلي، ودي حاجة مش مفضلة، هتلاقي بجانب كل مكان في البرنامج السياحي خانة ممكن تلغي منها المكان إللي أنت عايز تلغيه.
- المخطط أو البرنامج السياحي لأي دولة في العالم، لازم تختار مدينتين علي الأقل تزورهم في البلد.
- بمعني: لو أنت مثلاً مسافر إيطاليا سياحة، فيها مدن كتير سياحية، لازم تختار في البرنامج السياحي مدينتين أو أكتر تزورهم وليكن مثلاً (روما وفينيسيا)، لأن أي سائح لما بيقرر يزور بلد بيحاول يزور أكتر من مدينة لأنها فرصة ورحلة متكلفة مش هيضيع وقت فيها في مدينة واحدة.
- لازم البرنامج السياحي بتاعك لا يقل عن 3 أو 4 ايام في كل مدينة.
- تراعي التوقيت إللي هتنتقل فيه من مدينة للتانية ووقت الرجوع (راجع الكلام دا في البرنامج السياحي إللي هتعمله علي الموقع).
- خلي بالك من تاني أو تالت مدينة هتزورها هي نفس المدينة إلي هترجع منها لبلدك، يعني مينفعش مثلاً أن هتسافر إسبانيا تزور مدريد وبعدها برشلونة، وحجز الطيران بتاعك مكتوب فيه الرجوع من مدريد نفس وجهة السفر (علشان كدا قولنا أعمل المخطط السياحي الأول).
- بعد ما تطبع المخطط أو البرنامج السياحي، حط ورقة كويسة وشيك كدا في الأول مكتوب فيها أسمك ورقم باسبورك ومهنتك، وبعدها كلمتين حلوين كدا بيوصفو اهتمامك بالسفر للبلد دي وأنك دايما تشوفها في الأفلام الأجنبية والانترنت (ما تتعداش 5 أو 6 سطوروأبقي ترجم من علي جوجل)، وتكتب في الآخر أن البرنامج السياحي إللي أنت مقدمه اخترت فيه كل مكان باهتمام وشغف وحابب فعلاً تزوره، وأنك ممكن تعمل تعديل بسيط عليه لو لقيت عروض أقوى في الفندق إللي هتنزل فيه (معروف أن أي أجنبي بينزل في فندق أو شقة فندقية أو حتى هيسكن مع أسرة أو شباب، بيلاقي مالك الشقة بيوزع عروض لشركات)، هتلاقي الموظف في السفارة يقدر الكلام دا كويس ويعرف أنك فاهم.
دا كان أهم النقط والتفاصيل إللي تهمك عن الدعوة والبرامج السياحية وكيفية عملها.
أهم المواقع بالنسبة لدعوات البزنس:-
- موقع (WeSwap)، الموقع دا فيه أهم الأحداث إللي بتحصل في بلاد كتير حول العالم ومش شرط تكون بزنس، كمان حفلات وحاجات كتير، هتستفيد من الموقع دا إنشاء الله، كل إللي عليك هتدخل الموقع وتسجل، وتدور بقي علي النشاط إللي عايزه في البلد إللي أنت عايزها.
- موقع (eventseye)، ودا موقع خيالي، فيه كل حاجة عن معارض البزنس في أي مكان في العالم، الموقع دا عايز مقالة لوحده، لكن تقدر تضغط علي اللينك، وتختار ظهور النتائج بواسطة (أسم البلد - مجال البزنس - وغيرهم)، أنت هتختار حسب الموقع أو البلد، هيفتحلك كل بلاد العالم، أختار البلد إللي عايز تروحها، وعيش في كمية المعارض والأحداث طول السنة. وطبعاً في حالة الدعوة البزنس أختار المعرض الأول وبناء عليه أختار ميعاد السفارة علشان يبقي فيه وقت كافي.
طبعاً إحنا بنفضل البرامج السياحية في المقام الأول، لأنها مشهورة جداً ومقبولة طول السنة حتى في الشتاء (يعني احتفالات رأس السنة في الشتاء)، دا غير إنه لا قدر الله لو حصل رفض أول مرة، تقدر تكرر المحاولة وساعتها هتبقي علي نفس موقفك سياحة لأنها متاحة طول الوقت.
إنما لو بزنس وأترفضت لا قدر الله، هتبقي في ورطة، لأنك لو حجزت ونظمت برنامج ودعوة بزنس تاني هيبان ليهم أن أهتمامك زايد جداً أنك تعمل بزنس في البلد دي بالأخص، وساعتها هيتفهم أنك مصمم أنك تروح بلدهم وخلاص والورق إللي أنت مقدمه مجرد شكليات.
بكدا نكون خلصنا موضوع اليوم يا أصدقائي الأعزاء، نتمني نكون أفدناكم قدر الإمكان، ولو عجبك أي مقال قرأته، شاركنا رأيك وأتفاعل معانا وتبقي صديق الموقع.
بنرحب بأسئلتكم طول الوقت، ولو فيه حاجة ناقصة في أي موضوع خاص بالسفر أبعتلنا رأيك وإنشاء الله هنهتم بالجزء إللي هتطرحه علينا.
ليست هناك تعليقات:
إرسال تعليق