أسئلة الانترفيو في أي سفارة أجنبية والإجابات التي تحدد الرفض من القبول وخاصة لدول الشنجن وأميركا وبعض الدول التي تتبع نظام المقابلة الشخصية
أصدقائي الأعزاء ... هنتكلم اليوم عن أسباب رفض سفارات الدول الأجنبية حصولك علي التأشيرة، وما هي عوامل النجاح التي من يجب أن تتوافر في أوراقك من خلال تجارب وخبرات سابقة حققت أعلي نسب نجاح. وهنتكلم كمان عن عواقب رفض الحصول علي تأشيرة شنجن وغيرها من التأشيرات، ونعالج الرفض دا إزاي.
عايز بس أقول حاجة هتفرق معاكم كتير أوي وفكروا فيها كويس جداً لأنها ممكن تخليك تلغي فكرة سفرك أصلاً.
السفر دا حلم ناس كتير أوي ومهما أختلفت الأسباب العامل المشترك بين كل الناس إللي عايزة تسافر هو تحقيق عائد مادي محترم. السبب الأساسي رقم 2 هو الحياة في مجتمع متقدم ومستقر يوفر سبل راحة في مختلف أوجه الحياة. وأياً كان الأسباب التانية، السفر هو مشروع.
أيوة مشروع ... لأنه زي أي نشاط تاني بيكلف فلوس وتدفع فيه إللي وراك وإللي قدامك وتستلف وتندين علشان توصل للوجهة بتاعتك. طيب يبقي مش مروع إزاي؟؟؟ ... لا دا كدا السفر مشروع حياة، لأنه مستمر ومكمل معاك، والموضوع المهم مش أنك إزاي تسافر وبس، لا الأهم هتتعامل إزاي مع المجتمع الجديد دا، وتندمج فيه إزاي وهتاخد وقت أد إيه؟؟ وهتحقق هدفك في الربح المادي بعد مدة أد إيه، وهتحقق إللي فبالك أصلاً ولا لأ. كل دي أسئلة لازم تسألها لنفسك وتكون واضح في الإجابة علشان متخدعش نفسك.
طيب بنقول كل دا ليه بقي؟؟؟ علشان أوصلك فكرة واحدة بس هي: أن السفر طالما مشروع، ومشروع مكلف كمان، لازم لازم تستعدله كويس وترتب ورقك كويس أوي، وأهم عوامل نجاح علشان توصل لوجتهك مهما كانت صعبة أو شبه مستحيلة: الصبر ثم الصبر ثم الصبر ثم الفهم التام لكل الإجراءات ثم التنفيذ بكل هدوء وتأني من غير ما تبص علي عامل الوقت في تنفيذ كل خطوة مطلوبة علشان مشوارك يبقي ناجح، لأن الخطوات الصح للسفر وإللي تضمنلك الحصول علي التأشيرة مهما كانت صعبة هي أنك هتكلف كل ورقة من ورق ملفك، فطبيعي لازم تتأني وتاخد بالك من كل خطوة علشان غير كدا يبقي أنت بتضيع وقت علي الفاضي وكمان فلوس ومفيش نتيجة مضمونة بالأسلوب دا.
لو فهمت الكلام دا كويس يالا نكمل موضوعنا، وراجع كل مقالاتنا كلمة كلمة وتأكد أنك لو نفذتها صح وبتأني ومن غير استعجال، تأكد بعد توفيق ربنا سبحانه وتعالي، هتوصل لأعلي أعلي نسبة نجاح بإذن الله.
ركزوا كويس أوي في المقالة دي ...
أبرز أسباب رفض السفارة حصولك علي التأشيرة، كل العناصر دي للسفارات إللي بتعمل مقابلة وإللي من غير مقابلة، (كل الأسباب دي أتكلمنا عنها بالتفصيل في مواضيع مخصصة لكل بند هسيبلك الروابط بتاعتها في نهاية المقالة):-
- المهنة في جواز السفر وأوراقك كلها طازة (أنت عاملها من وقت قريب وقدمت علطول).
- معلومات وظيفتك (خطاب جهة العمل) والراتب فيه غير مترابط مع حركات السحب والإيداع في كشف الحساب البنكي.
- عدم قدرتك علي تقديم ورقة مهمة جداً (صورة من تعاقدك مع جهة العمل إللي المفروض أنت بتقول شغال فيها).
- كشف الحساب البنكي جديد وأقل من مدة ستة أشهر.
- تاريخ فتح كشف الحساب البنكي غير متوافق مع تاريخ تعيينك أو حصولك علي المهنة إللي أنت ضايفها علي جواز السفر (لازم وأنت بتجهز ورقك تاخد بالك من كل التفاصيل دي وأقرأ مقالاتنا عن المواضيع دي بالتفصيل)، ما هو أحنا أتكلمنا قبل كدا في موضوع "إزاي تعمل كشف حساب بنكي"، أتفقنا أن كل أول شهر هتحط مبلغ مالي ثابت باستمرار هيبان للسفارة أن دا الراتب بتاعك، ويكون نفس المبلغ مثبوت في خطاب جهة العمل.
- كشف الحساب البنكي لازم لازم يكون متوثق ومختوم من البنك المركزي، لأن السفارات إللي فيها مقابلة شخصية مش بيلحق ومعندوش وقت يراجع كشف الحساب بتاعك مع البنك، لكن بيبان بالنسباله إذا كان وهمي ولا فعلاً حقيقي، ويعتبر أقوى إثبات ختم البنك المركزي.
- اكتشاف السفارة أن خطاب جهة العمل منسوب لشركة مش موجودة أصلاً (الناس إللي بتروح لأشخاص وشركات يعملوا الأوراق دي ومش فاهمين أن أدق التفاصيل بتفرق مش أي ورق وخلاص).
- عدم تقديمك للسجل التجاري والبطاقة الضريبية لجهة العمل إللي أنت منسوب ليها (لو أنت مش مقدمها السفارة بتعملك أستكمال بيانات وبيطلبوا منك تجيب صورة من الورق دا وكمان صورة تعاقدك مع الشركة أو المنشأة).
- خطأ في ملء بيانات الأبلكيشن الخاص بالسفارة، أو عدم كتابة البيانات بشكل غير صحيح.
- تواريخ الذهاب والعودة بالرغم من أنها بسيطة جداً وناس بتشوفها تافهة، إنما بتودى في داهية لو مش مراعي المواعيد صح، لأن المواعيد دي مرتبطة بتاريخ حجزك للفندق وهتوصل أمتي للفندق بعد نزولك من المطار، وهل كل دا في نفس اليوم ولا أختلاف التوقيت بين الدولتين هيكون دخلك في نهاية اليوم وبداية يوم جديد.
- تاريخ الذهاب والعودة مهم جداً برضه لأن الناس إللي بتدخل تعمل برنامج أو مخطط سياحي سواء كان بنفسهم أو بيشتروه، مش بيراعو برنامج الرحلة هيبتدي من أمتي، دايماً اليوم إللي بتوصل فيه الفندق بيبقي متعب وغير كدا محدش بيبقي مهتم أنه يستغله، إنما بيتكتب في اليوم دا أنك هتقضيه في الفندق وتاخد جولة حول الفندق للتعرف علي المنطقة سيراً علي الأقدام.
- الحجوزات غير سليمة، أو تم حجزها فعلاً بس الفندق بعتلك إشعار لتأكيد بياناتك وأن مخطط الرحلة بتاعتك زي ما هو مش ملغي، وأنت طبعاً لا بتهتم بالإيميل، وإذا كان حد عاملك الورق برضه مبيهتمش، تلاقي نفسك واخد خانة رفض منورة كدا أسمها حجز رحلتك غير مؤكد وغير مترابط.
- وثيقة التأمين الدولي الصحي مستخرجة من شركة تأمين غير معترف بيها لدي السفارة، دا لو مكانتش أصلاً مضروبة (لو حد تاني إللي بيعملهالك ممكن يعملها مضروبة)، وغير مستوفية مدة الرحلة بتاعتك (الناس بتسترخص ورقة التأمين ومش بيعملوها صح مع أن أنت لو عملتها صح وأترفضت لا قدر الله تقدر ترجع للشركة بورقة الرفض وتسترد جزء من إللي دفعته بس طبعاً محدش بيفهمك النقطة دي).
- عدم وجود مخطط سياحي لرحلتك، أو ووجود مخطط ضعيف مش مترتب صح (من الآخر كدا واخده قص ولزق من ع النت دون مراجعة ولا فهم).
- تقديم أوراق في ملفك مكتوب فيها أنها مدفوعة، وتكون غير مدفوعة (دا غش وبيتعرف بسهولة)، زي مثلاً الدعوات البزنس والبرامج السياحية وتذاكر عروض معينة بيبقي مكتوب عليها أنها مدفوعة وهي أصلا متسجلة ببلاش.
- عدم وجود رصيد كافي في كشف حسابك البنك، لازم يكون كشف حسابك فيه مبلغ يغطي تكاليف الرحلة ومدة إقامتك، لا وكمان لو فرضنا الرحلة كاملة تكلف (1000ج) علي بيل المثال طبعاً، لازم يبقي موجود في كشف حسابك ضعف المبلغ دا، لأن مش من الطبيعي لو معاك مثلاً (1500ج) أنك تصرف (1000ج) علي رحلتك وتقعد فاضي بعدها لمجرد السياحة، وخصوصاً لو مفيش حركات سحب وإيداع قوية ومستمرة بانتظام.
- عدم تقديم أوراق ملكية والإكتفاء بكشف الحساب البنكي فقط، وأوراق الملكية دي زي مثلاً شقة أو بيت ملك أو عربية أو قطعة أرض أو وديعة بنكية حتى لو كانت بمبلغ مش كبير أو محل وغيره من الأشياء إللي بتدل أنك عندك أصول وثوابت في بلدك ترجعلها تاني.
- فيه دول زي الولايات المتحدة الأمريكية وكندا وأستراليا وإنجلترا، بيدققوا في الأبلكيشن بتاعهم علي مصادر دخلك والفلوس إللي معاك (سواء كانت رأس مال أو أصول ثابتة)، وبيطلبوا منك تجاوب علي أسئلة تخص أوجه الصرف بتاعتك طول الشهر من مصروف شخصي ولو عندك عربية بتصرف عليها أد إيه في الشهر، ولو عندك مشروع فيه كام عامل ومدير وموظف ورواتبهم أد إيه، من الآخر كدا بيفهمو من كل إللي بتكتبه دخلك أد إيه وبتصرف منه كام وبيتبقي صافي ربح ليك كام ويروحو يراجعوه بكشف الحساب بتاعك يا صديقي (فهمت بيعرفو منين إذا كان ورقك مترتب صح ولا غلط وبيدل علي البيانات إللي أنت مقدمها صح ولا غلط).
- عدم ترجمة الأوراق، أو ترجمتها في مكاتب ترجمة غير معتمدة للسفارة.
- جواز السفر بتاعك أبيض زي الفل (مفيهوش أي تأشيرة)، يعني أنت طلعت الباسبور وروحت جري علي السفارة عايز تاخد التأشيرة سياحة (مهمة جداً جداً جداً جداً جداً لأبعد ما تتخيل النقطة دي)، لأن جواز سفرك بالنسبة للسفارة هو سيرة ذاتية بيعبر عن خبرتك وتجاربك وشخصيتك (لما يبقي أبيض يبقي حضرتك كمان أبيض ومش مصدر للثقة ليهم).
- عدم تأكد السفارة أو الوثوق في نيتك للسفر، يعني لو أنت مقدم سياحة فالورق إللي في إيدهم مش قوي ومش بتاع واحد عايز يسيب بلده ويصرف أد كدا علشان يتفسح في بلدهم (علشان كدا بنقول الورق المدفوع فيه فلوس بيبقي قوي جداً وبيعزز موقفك).
- عدم تأكد السفارة من نيتك للرجوع لبلدك تاني بعد ما تسافر وتنتهي مدة السياحة بتاعتك، ودا طبعاً بيبقي بسبب الأوراق الضعيفة إللي حضرتك مقدمها، دا غير أنك مقدمتش أي أوراق تانية تدل علي قوة موقفك المالي في بلدك، زي الأملاك مثلاً أو أي حاجة تثبت أنك صاحب رأس مال وأصول ثابتة غير الفلوس إللي في كشف حسابك البنكي.
- في حالة المقابلات الشخصية، التوتر والأرتباك عامل سيء جداً يخليك تتلخبط في الإجابات حتى لو كانت بسيطة ومش مستاهلة تفكير، طبعاً لازم تفهم أن الموظف أو الموظفة إللي بيعملو معاك المقابلة الشخصية دارسين لعلم النفس وبيفهمو كل حركة وكل تعبير علي ملامحك (ممكن تكون بزنس مان كويس وراجل متكلم وحافظ كل تفاصيل رحلتك لكن التوتر والقلق يخلي الموقف مش في صالحك).
- في المقابلة الشخصية دايماً ترتيبك للورق في الملف وعرف مكان كل ورقة فين بالترتيب، هيخليك تتخطي مشكلة أن الموظف أو الموظفة يطلبوا منك ورقة وتاخد وقت علي ما تلاقيها، أو مثلاً تبقي معاك بس ناسي شكلها (في حالة لو حد تاني إللي عاملك الورق وشرحهولك ع الطاير كدا).
- لازم تكون إجاباتك واضحة وما بين الاختصار والشرح الوافي للسؤال بس باختصار، يعني لا تزود في الكلام ولا ترد رد مختصر مش مفهوم.
- تكون مجهز إجاباتك كويس أوي لكل الأسئلة إللي ممكن تتسأل ليك (كلها أسئلة عن الورق إللي أنت مقدمه وانت مين في الحياة).
- بنسمع ردود كتير أوي لإجابة سؤال (إيه إللي يضمن لنا أنك ترجع تاني بلدك؟)، والغالبية العظمى أجوبة ملهاش قيمة فعلية.
- إجابتك تكون مش طويلة ومضمونها أنك عندك البزنس بتاعك وصاحب عمل أو وظيفتك كويسة وبتكسب منها كويس وعندك عربية وشقة أو بيت ملك ورصيد في البنك ومتجوز وعندك أسرة لو سيبت كل دا ومرجعتش (أمريكا أو كندا أو أوروبا هتقدملك إيه علشان مترجعش لبلدك تاني؟)، يبقي سيادتك كدا رديت علي سؤال بسؤال للموظف وخليت دماغه تشتغل وفي نفس الوقت شرحت نقط القوة عندك بدون تطويل في الكلام.
- من أسباب الرفض برضه أنك تكون واخد مراتك معاك وتقدم علي التأشيرة (دا بالنسبالهم نوع من الهجرة حتى لو أنت سايب أولادك هنا، لأن القانون هناك أياً كانت البلد إللي أنت مسافرها هيديك الحق أنت ومراتك تجيبو الأولاد بسهولة).
- المظهر الشخصي العام ليك (لبسك وشكلك ودخلتك وتصرفاتك جوة المكان وسلوكك إيه في الوقت إللي أنت قاعد مستني فيه دورك)، مش شرط طبعاً لبس معين، لكن شرط تكون منسق ومترتب في نفسك كدا وخطواتك بسيطة وفيها ثقة من غير ما تتلفت حواليك.
بكدا نكون وضحنا تقريباً كل العوامل إللي بتخلي السفارة ترفضك.
شوية نصايح ع السريع لكن في المضمون:
- أفهم كويس أوي البلد إللي أنت رايحها ونظام المعيشة فيها والتكاليف.
- أفهم إيه المطلوب منك من أوراق ولازم الورق دا يكون بيعبر عن كل التفاصيل المهمة للسفارة لأن الورق دا بيعبر عنك أنت.
- رتب أوراقك صح من البداية للنهاية.
- فكر وأدرس وأفهم كل خطوة بتعملها كويس.
- رتب أفكارك وأكتب كل حاجة أنت محتاج تعملها.
- خلي حد قريب منك يراجع معاك تفاصيل كل خطوة بتعملها لأنه ممكن يشوف حاجة أنت مش واخد بالك منها.
- أبعد عن الورق المضروب.
- أبعد عن الأستعجال في تخليص الأوراق.
- باسبورك هو شخصيتك بالنسبة للسفارة لازم يكون قوي جداً ومشرف ليك.
- أنت كدا كدا لو لجأت لشخص أو مكتب يجيبلك تأشيرة بعينها، كلنا عارفين أنت هتدفع أد إيه (مبالغ كبيرة).
- لا أستغل أنت المبلغ إللي هتدفعه وأقل بكتير علشان توصل لهدفك وبمجهودك.
- لازم لازم لازم تاخد تأشيرتين علي جواز السفر قبل ما تقدم علي أي دولة زي (أوروبا أو أميركا أو كندا أو إنجلترا أو نيوزيلندا وغيرهم من الدول القوبة جداً في تأشيرتها.
- هتاخد التأشيرتين دول علي مراحل مش ورا بعض.
- أول تأشيرة خليها سياحة ودي يفضل جداً جداً أنها تكون وقت احتفالات رأس السنة (تكون هناك وتحضر أحتفالات رأس السنة)، زي مثلاً (روسيا - قبرص - سنغافورة - ماليزيا - تايلاند - إندونيسيا - الهند - فيتنام)، تأشيرتهم رخيصة وسهلة والرحلة كلها بمصاريفك هتلاقيها مبلغ أكبر شوية من إللي ممكن تدفعه في مصيف.
- التأشيرة التانية خليها لدولة يبان أنها بزنس زي (الصين - تركيا - اليابان)، تأشيراتهم كلها سهلة مش صعبة، عايز أقولك كندا بجلالة قدرها بتحب تأشيرة الصين أوووووووي (عن تجربة بجد).
- ويا سلام لو عرفت تعمل إقامة في تركيا أو الصين تبقي معلم، هيبان لأي سفارة دولة قوية أنك عملت إقامة علشان تروح وتيجي براحتك من غير ما توجع دماغك كل مرة في أنتظار صدور التأشيرة.
أصدقائي الأعزاء بالطرق إللي قولناها دي نتاج خبرة ومواقف مرينا بيها وشوفناها وعمرها ما هتبقي موضة قديمة، وأوعي تخاف أنك تتحرك علي الخطوات دي، لأنها عمرها ما هتخسرك، التأشيرة علي الباسبور كل ما بتقدم كل ما بيبقي ليها قيمة (طبعاً خلال مدة لا تزيد عن 3-5 سنوات).
أنت بتأسس باسبورك، بعد الخطوات دي كلها هتلاقي نفسك عندك خبرات كتيرة كويسة تنفعك في مشوار سفرك وهتتعلم وتبقي الأمور طبيعية بالنسبالك، ولما تقدم في سفارة اي أميركا أو كندا إللي الكل بيترعب منها وبيدفعوا فيها مبالغ خيالية، هتكون أنت شخص ساعتها واثق من نفسك، باسبورك قوي، روحت بلدين ورجعت يعني أتعرفت علي ثقافات جديدة وألتزمت بمدة التأشيرة بدون مخالفات في الوقت، عرفت إزاي تتعامل في بلد غير بلدك، صرفت دا كله ورجعت يبقي أنت شخص صرفت وأستفدت اكتر من إللي صرفته.
هي دي النظرة إللي بيحب يشوفها أي قنصل في الشخص إللي قدامه أو الباسبور إللي قدامه.
أصدقائي الأعزاء أتمني نكون قدرنا نوفر كل المعلومات اللازمة عن الموضوع ليك، وبنرحب بتساؤلاتكم طول الوقت، ونتمني تتفاعلوا معانا وتقولوا رأيكم في كل موضوع أتكلمنا فيه.
أقرأ أيضاً:-
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
- الأوراق المطلوبة للتقديم لسفارة شنجن، وتكملة الحجوزات اللازمة.
- طرق السفر إلي أوروبا بالنسبة للمصريين وأهمية الدعوة السياحية أو البرنامج السياحي وكيفية الحصول عليه.
ليست هناك تعليقات:
إرسال تعليق