طريقة حجز ميعاد سفارة ايطاليا بالقاهرة أو الإسكندرية
أصدقائي الأعزاء ... هنتكلم في مضوعنا عن طريقة حجز ميعاد مقابلة وملء الأبلكيشن الخاص بسفارة إيطاليا، وهنتكلم كمان عن الأوراق المطلوبة بالتفصيل والحاجات إللي ناخد بالنا منها كويس وإحنا بنقدم.
كمان هنتكلم سريعاً عن الحياة في إيطاليا، والوظايف إللي بيشتغل فيها المصريين وتكلفة المعيشة بالنسبة للشخص إللي رايح أول مرة.
عنوان مكتب تقديمات السفارة بالقاهرة والأسكندرية: أضغط هنا
خطوات حجز ميعاد في سفارة إيطاليا:
بالنسبة لموضوع حجز المواعيد هيبقي عن طريق مكتب أسمه (vfsglobal)، ودي شركات خدمات تكنولوجية بتقدم خدمات للحكومات والبعثات الدولية، والمكتب دا دوره أنه هيستلم من الأوراق الخاصة بالسفر بعد ما تحدد موعد، وبياخد بصماتك وتدفع المصاريف الخاصة وهي ما يعادل (80 يورو).
بعد كدا دور المكتب دا أنه وسيط بينك وبين السفارة الإيطالية، هو يقوم بالإجراءات مع الأشخاص ويرسلها للسفارة، ويرجع يستردها تاني علشان يرجعهالك (سواء كنت مقبول أو مرفوض)، وعايزين نأكد علي حاجة مهمة أن المكتب دا بالموظفين إللي فيه معندهومش أي صلة أو تدخل بأنك تترفض أو تتقبل.
أول خطوة هندخل علي الموقع من هنا، اللينك دا هيدخلك علي الصفحة باللغة العربية، هتلاقي خانة أسمها (تحديد موعد) هتضغط عليها، هتنزل شوية هتلاقي جملة (1-حجز الموعد من خلال الموقع اضغط هنا)، هتضغط مكان العلامة هتدخل علي فحة فيها جملة باللغة الإنجليزية وسطها كلمة (click here)، أضغط عليها هتدخل علي صفحة تانية بيطلب منك تدخل بيانات البريد الإلكتروني وكلمة السر ومستطيل تحتها تكتب فيه الحروف إللي ظاهرة جمبه زي ما هي بالظبط، يعني الحروف إللي مكتوبة كبيرة تبقي كبيرة والصغيرة نفس الكلام.
أنا بشرح يا جماعة بالتفصيل الممل علشان فيه ناس متعرفش تعمل أي خطوة من الخطوات المطلوبة، وهسيبلك الرابط تدخل علي الصفحة إللي تسجل فيها البريد الإلكتروني مباشرة (أضغط هنا).
أنا مسبتش الرابط من الأول وشرحت لأن الرابط دا طويل وممكن ميشتغلش، أضغط علي الرابط فتح معاك يبقي كويس، مفتحش يبقي أحنا شرحنا بالتفصيل توصل لصفحة التسجيل إزاي.
طبعاً لازم تسجل علي الموقع علشان تقدر تدخل، هتلاقي كلمة (new user)، أضغط عليها، هتتنقل صفحة تكتب فيها بياناتك بالترتيب (الأسم الأول - الأسم الأخير - البريد الإلكتروني - رقم التليفون - الرقم السري - الرقم السري تاني).
بعدها هتلاقي سطر صغير بالإنجليزي معناه أنك موافق علي السياسات والشروط، اضغط علي المربع الصغير جمبها علشان تظهر علامة (صح)، وأنزل أكتب الحروف إللي مكتوبة كررها في المستطيل، وبعدها هتلاقي تحت 3 أزرار باللون الأزرق أضغط علي مربع (submit)، هيظهر مربع فوق أضغط علي (ok)، هينقلك بعدها علي صفحة أن التسجيل أتقبل، وهتلاقي الإيميل والباسوورد مكتوبين، أنت بس هتملي المستطيل إللي تحتهم بالحروف زي ما مكتوب عندك وتضغط (continue).
لو مفتحش معاك من أول مرة، هيظهر لك رسالة معناها أنهم بعتولك رسالة علي البريد الإلكتروني إللي أنت كتبته، هتدخل علي الرسايل عندك وتفتح اللينك إللي هتلاقيه عندك في الرسالة (activate now).
انت كدا علي يا صديقي علي صفحة بيضا وعلي الجنب اختيارات كدا هتيجي علي أول أختيار (Schedule Appointment) وتضغط عليها.
- أول أختيار: البلد إللي هتزورها.
- تاني أختيار: بلدك إيه.
- تالت أختيار: المركز إللي أنت تابع ليه (قاهرة - أسكندرية)، وخلي بالك لأنه بيظهرلك أختيارين لكل محافظة، اختار الأختيار الثاني دايماً.
- رابع أختيار: الغرض من الزيارة، هتفتح وتختار آخر حاجة إللي هي سياحة (Tourism)، لو ليك اختيارات تانية عيش براحتك.
شرقية - منوفية - غربية - اسكندرية - دقهلية - بحيرة - دمياط - كفر الشيخ - مرسي مطروح (المحافظات دي تبع مركز تقديمات أسكندرية)، غير كدا يبقي القاهرة.
هتدخل بعدها علي صفحة دور علي مربع مكتوب فيه (add customer)، يعني إضافة شخص أو عميل، هتنتقل علي صفحة تكتب فيها بيانات تاني:-
- رقم الباسبور
- تاريخ الميلاد
- تاريخ أنتهاء الباسبور
- الجنسية
- الأسم الأول (هتلاقيه مكتوب لوحده)
- الأسم الأخير (هتلاقيه مكتوب لوحده)
- النوع (ذكر - أنثي)
- رقم التليفون (هتلاقيه مكتوب لوحده)
- البريد الإلكتروني (هتلاقيه مكتوب لوحده)
بعدها تضغط (submit)، هيفتحلك بعدها صفحة المواعيد عبارة عن جدول، كل المواعيد إللي باللون الأخضر دي مواعيد متاحة أختار الميعاد المناسب ليك وأكده هتتنقل علي صفحة فيها البيانات إللي أنت سجلتها كلها بالميعاد بتاعك بالتوقيت إللي هتروح فيه مركز التقديمات، دور علي الخانة إللي بيقولك فيها إرسال بالبريد الإلكتروني دي مهمة جدا علشان تعرف تطبع الورقة.
بكدا يبقي حجزنا ميعاد في مركز التقديمات التابع لسفارة إيطاليا سواء بالقاهرة أو الإسكندرية بالتفصيل. وخلي بالك جداً من كل حرف بتكتبه، لأن لو غلطت في حرف واحد يبقي أنت بتتكلم عن شخص تاني غيرك.
الأوراق إللي بتطلبها السفارة:-
- استمارة الأبلكيشن مكتوب فيها البيانات باللغة الإنجليزية (رابط تحميل الأبلكيشن "أضغط هنا"، هتنزل لتحت هتلاقي خانة تحميل أضغط السهم وأختار سادس أختيار إللي هو "Tourist Visa-Schengen Application Form").
- جواز سفر ساري لمدة 6 شهور قادمة.
- جواز السفر القديم (لو عليه تأشيرة مخالفة أو كنت كاسر فيزا بلاش تقدمه).
- لازم تجيب شهادة تحركات موجهة للسفارة من مجمع التحرير حتى لو كان معاك جواز السفر القديم.
- حجز فندق (بيطلبوه مؤكد، راجع الموضوع إللي أتكلمنا فيه قبل كدا عن طريقة عمل الفندق المؤكد).
- حجز طيران.
- البرنامج السياحي بتاعك.
- وثيقة تأمين صحي دولي محدد بقيمة 30 ألف يورو (قول للشركة إللي هتحجز منها بس وهو هيفهم وتمنها بسيط مش غالي).
- خطاب جهة العمل مذكور فيه الراتب (شرحناه قبل كدا).
- عقد العمل.
- برنت تأمينات أجتماعية.
- السجل التجاري والبطاقة الضريبية (لأصحاب العمل).
- شهادة قيد من المدرسة أو الجامعة (بالنسبة للطلبة).
- لمن هم أقل من 18 سنة: شهادة من الوالدين موثقة في مكتب الشهر العقاري وإقرار منهم بالموافقة علي سفرك. وحضور أحدهم للسفارة للتوقيع علي الأبلكيشن.
- صور شخصية 4*6 خلفية بيضاء (مش شرط 3.5*4.5).
- الورق كله يكون من أصل وصورة.
- خلي ورق الحجوزات والباسبور لوحدهم، والأوراق الخاصة بشغلك لوحدها.
- لو معاك تأشيرة أو أكتر علي الباسبور الجديد أو القديم صورهم وصور أختام الدخول والخروج.
- ترجمة الأوراق إلي اللغة الإيطالية أو الإنجليزية (يفضل اللغة الإيطالية).
أهتم بالحاجات دي كويس وخلي بالك وأنت بتعملها:
- أملء بياناتك بهدوء وتركيز علشان متكتبش حرف غلط.
- بعد ما تخلص ورقك راجعه وراجع بياناته والتواريخ.
- لازم تكون قدام مكتب التقديمات قبل ميعادك علي الأقل بساعة.
- خلي لبسك في العادي بدون تكلف أهم حاجة تكون منظم وملامحك واضحة كويس.
- بعد ما تبصم وتدفع الفلوس بتاخد وصل أوعي تضيعه لأن دا إللي هتستلم بيه.
- أحفظ المخطط أو البرنامج السياحي بتاعك كويس، وكل المواعيد المتعلقة بالرحلة، حتى كمان تبقي عارف أنت حاجز علي طيران إيه.
طريقة ملء الأبلكيشن خطوة بخطوة هتبقي في المقالة الجاية إنشاء الله علطول، علشان ميبقاش فيه تفاصيل غير الأبلكيشن وبس.
نبذة عامة عن تكاليف المعيشة والحياة عامة في إيطاليا:
إيطاليا من الدول الأوروبية الجميلة، وبتعتبر هي واليونان من أقرب الشعوب للمصريين في حاجات كتير، وشعب ودود جداً مش زي ما ناس كتير بتقول.
في الأول بس أي مواطن من البلد بيخاف من الأجانب عموماً بسبب الأحداث العنيفة إللي بقت تحصل كتير آخر كام سنة، إنما التعامل في العادي بيرحبوا دايماً بأي شخص أجنبي، والشعب الإيطالي متعود علي كدا لأن أعداد هايلة من السياح من كل مكان في العالم بيزوروا إيطاليا طول السنة مش في الصيف بس.
طبعاً مفيش حاجة أسمها مصري بيسافر مالوش صديق أو حد معرفة حتى ولو من بعيد، بنقول كدا لأن الشخص إللي عايش هناك حتى لو معندوش ورق يقدر يدلك علي الخطوات الأولية المهمة، زي السكن مثلاً والأماكن إللي ممكن تشتغل فيها باليومية بدل ما تصرف من جيبك.
مش محتاج أقولك طبعاً مهما إن كنت نازل علي حد هناك لازم يبقي معاك فلوس علشان لا قدر الله لو أي ظرف حصل متبقاش في الشارع.
وكدا كدا حتى لو رايح علي حد هناك هتدفع في السكن برضه، وهتقعد كام يوم علي ما يبتدي ينزلك شغل، وطبعاً مش شرط أنك هتشتغل الصنعة إللي أنت بتفهم فيها، لا الشغل إللي قدامك متقولش عليه لا علشان تعرف تعيش لغاية ما تتعلم لغة وأمورك تتظبط مع الوقت.
البلد جميلة وكل واحد بيسافر ونيته سليمة وهدفه واضح ربنا بيكرمه. ومتوسط الرواتب من 1000 ل 1600 يورو، السكن والأكل والمواصلات بيفرق من مكان للتاني لكن المتوسط ممكن تصرف في الشهر من 700 ل 900 يورو.
بكدا أصدقائي الأعزاء نكون كملنا موضوعنا، نتمني تشاركنا برأيك ولو ليك أي سؤال أكتب في التعليقات، وإنشاء الله هنتكلم طول الوقت عن المواضيع إللي تهمكم في مجال السفر للخارج.
أقرأ أيضاً:-
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
- الأوراق المطلوبة للتقديم لسفارة شنجن، وتكملة الحجوزات اللازمة.
- طرق السفر إلي أوروبا بالنسبة للمصريين وأهمية الدعوة السياحية أو البرنامج السياحي وكيفية الحصول عليه.
- أسباب رفض الحصول علي تأشيرة دولة أجنبية، وبعض الحلول العملية لتجنب الرفض.
ليست هناك تعليقات:
إرسال تعليق