إزاي تعمل HR، خطاب جهة العمل

إزاي نعمل HR أو خطاب جهة العمل؟؟؟

أصدقائي الأعزاء ... اتكلمنا في المقالة الأولي عن موضوع إزاي نعمل وظيفة مناسبة وقوية نقدر نقدم بيها في سفارة أي دولة أجنبية، واتكلما عن كل الخطوات الضرورية والمهمة في الموضوع، والاقتراحات اللي ممكن تكون مناسبة مع معظم الشباب وإمكانياتهم من غير ما تضطر تلجأ لشخص أو مكتب وتحمل نفسك أعباء مادية. لقراءة الموضوع كامل: اضغط هنا ...

كمان اتكلمنا في المقالة التانية عن موضوع إزاي نعمل كشف حساب بنكي مناسب وقوي نقدر ندخل بيه أي سفارة من غير خوف ولا قلق، ونعمل كل الخطوات بنفسنا بدون تعقيد، ومعظم الحلول والأفكار لزيادة المبلغ بتاعك في كشف الحساب البنكي. لقراءة الموضوع كامل: اضغط هنا ...

موضوعنا اليوم هيبقي عن خطاب جهة العمل (HR). خطاب جهة العمل هيرجعنا شوية تاني لموضوع المهنة وموضوع كشف الحساب البنكي (زي ما قلنا وبنقول وهنفضل نقول كل خطوة مرتبطة باللي قبلها، وكل الخطوات لازم تبقي صح علشان كل ورقة تكون مكملة لغيرها ويبقي ملفك كامل وقوي). يلا نبتدي ...

تعريف سريع لخطاب جهة العمل:

خطاب جهة العمل هو من الورق المهم جداً جداً، وهو خطاب بيطلع من الجهة اللي بتشتغل فيها، وبيوضح المسمي الوظيفي للشخص، الراتب، العمولة (إن وجد)، تاريخ التعيين، بيوضح كمان إن كنت شخص جيد في العمل ومتعاون مع باقي زملائك.

أخطاء بيقع فيها الشباب اللي عايز يسافر، ويكون متفق مع شركة مثلاً أو شخص هيخلص كل الورق ويسلمك علي الجاهز، وطبعاً بيبقي عندهم نماذج جاهزة لخطاب جهة العمل يادوب يحط اسمك ورق الباسبور وخلاص علي كدا.

تيجي تقدم ورقك للسفارة ومفكر أن كل حاجة تمام، تلاقي لا قدر الله رفض بسبب عدم ترابط البيانات (يعني البيانات والأرقام اللي فكل ورقة في ملفك مش مترتبة ومختلفة عن بعضها).

ناس كتير أوي من اللي بيترفضوا في السفارات بيبقي مفكر أن سبب الرفض أن الحجز الفندق أو الطيران مش مؤكد، أو أن سبب الزيارة مش واضح ولا قوي، إلي آخره من الكلام. 

طبعاً مش هو دا السبب الوحيد، محدش بيقولك أن السبب دايماً دايماً ليه علاقة بالمسمي الوظيفي وعلاقته بخطاب جهة العمل وعلاقتهم هما الاتنين بكشف الحساب البنكي. والله يا جماعة دول أهم أهم 3 حاجات، هما البداية وأساس الورق كله في ملفك، وهما أكتر 3 حاجات بيوصفوك وبيوضحو موقفك في الدنيا إيه.

طيب إيه مضمون خطاب جهة العمل؟؟ ويتكتب فيه إيه بالتفصيل؟؟ وشكل الورقة النهائي يبقي إيه؟؟

1. أول حاجة في الورقة خالص بيبقي لوجو الشركة واسمها.
2. تاريخ صدور خطاب جهة العمل.
3. تحية لقنصل الجهة الي بيتوجه ليها خطاب جهة العمل (السفارة اللي هتقدم فيها مع ذكر مكانها سواء الإسكندرية أو القاهرة).
4. كتابة اسم الشركة وتخصصها.
5. شهادة الشركة أنك فلان "اسم رباعي زي ما في الباسبور بالظبط"، يحمل جواز سفر رقم "يتكتب رقم الباسبور بتاعك".
6. بعدها المسمي الوظيفي بتاعك "شغال إيه في الشركة".
7. بيتكتب كمان الرقم التأميني بتاعك (الشركة لازم تكون عاملة تأمين ليك بالمسمي الوظيفي).
8. طبعاً هيتكتب بعدها تاريخ تعيينك في الشركة، ,انك لسة علي ذمة الشركة ولم تترك العمل.
9. الراتب الأساسي بتاعك، بند العمولة (مهم جداً جداً)، دا غير الحوافز والبدلات والإضافي وغيرها من البنود اللي بتتكتب في خطاب جهة العمل (ممكن تكتفي بعبارة إجمالي الراتب والحوافز والبدلات = .... + عمولة ....).
10. فقرة يتكتب فيها أن الخطاب دا بناء علي رغبة "فلان" ولازم ترجع تذكر بياناتك الشخصية تاني (الاسم رباعي - رقم الباسبور).
11. فنفس الفقرة أنك طلبت إجازة من تاريخ كزا (هتبتدي أجازتك من العمل امتي)، لتاريخ (تكتب تاريخ انتهاء الإجازة بتاعتك).
12. بعدها بيتكتب أنت طلبت الإجازة دي بغرض السفر سياحة لدولة (بتتكتب اسم الدولة).
13. بعدها بيتكتب التاريخ اللي هترجع فيه العمل، ويتكتب بعدها مباشرة إجمالي مدة الإجازة بالحروف مش بالأرقام.
14. في النهاية، بيتكتب توصية اهتمام بالشخص المسافر موجهة لقنصل السفارة، وبيستأذن القنصل أن لو فيه أي بيانات زيادة السفارة محتاجاها عن الشخص دا يكلم المسئولين في الشركة بدون تردد، وأنهم بيرحبوا بحاجة زي كدا.
15. بيتكتب في السطر الأخير، إمضاء شئون العاملين، إمضاء المدير وإمضار رئيس مجلس الإدارة (كل شركة أو مصنع أو جهة عمل بتختلف في التدرج الوظيفي، يعني ممكن يكون جهة عمل فيها أكتر من الـ3 أشخاص اللي ذكرناهم بيمضو علي خطاب جهة العمل).
16. آخر حاجة خالص في الصفحة بتبقي أرقام تليفونات أرضي ومحمول وبريد الكتروني وعنوان تفصيلي للشركة وفروعها إن وجد.

طيب كويس لغاية دلوقت المعلومات دي ... إحنا عملنا المهنة بنفسنا زي ما مكتوب في المقالة الأولي، أو أنت أصلا معاك مهنة كويسة وكنت عاملها قبل كدا ... نجيب خطاب جهة العمل منين؟؟ ونعمله إزاي؟؟ أقولك:-

ركزوا معايا أوي في الكام نقطة الجايين دول:-

1. عملت مهنتك وظبطت امورك وثبت المهنة علي بطاقة الرقم القومي وعلي جواز السفر، عندي فكرة كويسة أوي ليك:
2. علشان تبقي في الأمان ومخطط لورقك ومنفذه بنفسك من الأول للآخر، هتحتاج والدك أو والدتك أو أخ أو أخت أكبر منك.
3. هيتعمل سجل تجاري باسم أي حد فيهم (شرط ميكونش موظف حكومي)، ويفتح ملف تأميني ويأمن عليك تبع النشاط اللي هيتعمل في السجل التجاري وبالمسمي الوظيفي بتاعك (التأمين يكون لمدة 3 شهور).
4. ساعتها يا صديقي هتقدر تعمل كارت شخصي وتعمل ختم للنشاط التجاري بطريقة رسمية وشيك ومفيهاش غلطة.
5. طيب مفيش حد في أسرتك ينفع يعمل كدا سواء علشان موظفين أو حد متأمن عليه حكومة أو قطاع خاص، ساعتها شوف عمك أو خالك أو أي حد من قرايبك يكون سنه مناسب يعمل سجل تجاري (هنا مش متقيدين أن السن يكون من 28 سنة فيما فوق زي ما قولنا في مقالة قبل كدا، ودا ببساطة لأن مش هما اللي هيقدموا علي التأشيرة).
6. طيب لسة متقفلة ومش لاقي حد يعملك كدا، ولا يهمك. دور علي أي حد صاحب مصنع أو شركة صغيرة أو أي نشاط تجاري وأطلب منه يأمن عليك لمدة 3 شهور بالمسمي الوظيفي بتاعك مقابل مبلغ مزي + أنك هتدفع تكاليف الورق والتأمين، (ناس كتير عملت كدا، وهتلاقي حد يعملك كدا لأن مفيهاش ضرر عليه ومش خسران حاجة بالعكس هياخد فلوس.
7. ممكن كمان تدور علي صفحتك علي فيس بوك عن ناس عايزة تسافر وبيجهزو ورقهم ويكونو في نفس محافظتك أو مدينتك، وأعرض الفكرة وقسموا نفسكم ناس تطلع السجل التجاري بأساميهم ويضيفو باقي الشباب تحت مسميات وظيفية مختلفة، وطبعاً التكاليف هتبقي مشتركة وقليلة علي كل فرد والاستفادة جماعية (ممكن الفكرة دي يطبقها 5 أو 6 اشخاص في وقت واحد وسجل تجاري واحد).
8. برضه لسة مش ظابطة، يا عم أنت بتقول كلام صعب وحوار كبير مش هنعرف نعمله وصعب ما نروح لأي شركة وخلاص أو أي مندوب شغال في السفريات يعمل الورق دا بفلوس ونريح بالنا.
9. غلط، خد بالك من حاجة، أنت مطلوب منك أصلاً مع جواب خطاب العمل نسخة من السجل التجاري والبطاقة الضريبية للشركة اللي أنت شغال فيها يا برنس. دا غير أنك حتى لو فرضنا جدلاً أنك لقيت حد يعملك كل الورق دا ويديلك نسخة من السجل التجاري والبطاقة الضريبية، أكيد أكيد أكيد هتلاقيه موزعها ألف مرة قبل كدا وبايعها لناس كتير، وطبعاً دا معناه أن البيانات دي متسجلة في السفارات وتبقي لبست في حيط لا قدر الله يا صديقي.
10. ها غيرت رأيك ولا لسة، نمشي صح أحسن ونتعب شوية واتنين؟؟؟ نمشي صح ونتعب شويتين، نكمل.
11. هقولك المرة دي تعمل إيه لو كل اللي فات مش نافع معاك، بس الخطوة دي هتدفع فيها فلوس الله وأعلم تكلفتها تبقي كام، بس هقولهالك. هتروح لمحاسب وتشرحله الموضوع وتطلب منه أنه يثبتك لأي نشاط تجاري هو مرخصه ويعملك تأمينات وخطاب جهة عمل والأهم من دا كله يجيبلك نسخة من السجل التجاري والبطاقة الضريبية، لو ملقتش شوف غيره وغيره لغاية ما تلاقي مكتب محاسب يكون عنده زباين هو اللي مرخصلهم النشاط وسهل يعملك كدا، وطبعاً بيبقي بموافقة صاحب النشاط (ممكن كمان محامي اللي يعملك كدا، دور براحتك وأدفع).
12. طبعاً الشباب اللي عامل مهنته صاحب نشاط أو مشروع الله يباركله ويسهل مشواره مريح نفسه من القصة دي.

عايزين نخلي بالنا من كزا حاجة ع السريع كدا:

• حاول أنك متقلدش أو تاخد لوجو من علي النت وتعمله شعار شركة، وتكتب أي كلام قص ولزق كدا من غير ترتيب (دا لمصلحتك والله).
• لو أنت كنت لجأت لشركة أو شخص يعملك الورق دا راجع عليه كويس جداً جداً، ودقق في كل كلمة، ولو عامله باللغة الإنجليزية أدخل علي جوجل للترجمة وفنط كل كلمة فيه لا تكون فيه حاجة مش مظبوطة أو أي كلام (لو عايز تراجع علي ورقك ابعته في تعليق أو علي رسايل الخاص في صفحة فيس بوك "اضغط هنا" واحنا نساعدك ونقولك إذا كان فيه حاجة غلط أو ناقصة).
• لو لسة بتعمل ورقك أقرأ مقالاتنا كويس أوى وهتعرف تعمل كل ورقة في ملفك باحترافية إنشاء الله، وأي مساعدة أو سؤال بخصوص مراجعة البيانات احنا تحت أمرك.
• بنقول تاني وتالت، خلي بالك أوي أوي من الرقم اللي هيتكتب في خانة الراتب، ميكونش مبالغ فيه، هتلاقي الأرقام المناسبة في مقالنا اللي فات اللي بيتكلم عن (إزاي تعمل كشف حساب)، سايبلك الرابط بتاعه فوق في أو المقالة.
• حتى لو كتبت أو مكتوبلك في خطاب جهة العمل أن ليك حوافز وبدلات إلي آخره من المسميات، لازم برضه إجمالي الراتب يكون معقول وطبيعي (أسأل أي حد هتلاقي حد من أصحابك أو أقاربك شغال في شركة بالفعل أسأله رنج الرواتب كام).
• خانة العمولة بتتذكر في خطاب جهة العمل بالأخص للوظايف اللي بيبقي فيها مبيعات وتسويق بالأكثر.
• خلي بالك كويس أوي من حروف أسمك، لازم تكون زي الباسبور بالظبط بدون مسافات ولا تنسيق يخلي الخط والحروف مش واضحين، ناس كتير بتقع في المشكلة دي، كل حرف لازم تراجعه كويس أوي.
• أي حاجة فيها أرقام أو حروف خاصة باسمك أو راتبك راجعها مرة واتنين وتلاتة كمان.
• لازم زي ما قولنا تذكر سفارة البلد إللي أنت هتقدم فيها وتحتها عنوانها في مصر، متنساش النقطة دي.
• لازم تتأكد أن عنوان الشركة مكتوب بالتفصيل وعنوان الفروع (إن وجد)، ورقمين تليفون محمول (ممكن واحد).
• لازم لازم بريد الكتروني ورقم أرضي ورقم فاكس (ممكن يكون رقم التليفون الأرضي هو نفسه رقم الفاكس عادي، يبقي أنت كدا لازم تكتبه مرتين، مرة في خانة التليفون الأرضي، ومرة في خانة الفاكس).
• مضطر أقول البند دا، لو أنت اللي عامل الورقة دي أو حد عاملهالك وعنده ختم شركة فعلاً، لازم تكتب تاريخ اليوم تحت إمضاء رئيس مجلس الإدارة أو إمضاء شئون العاملين.
• لازم يكون التاريخ اللي تحت الإمضاء هو هو التاريخ اللي مكتوب في أول الخطاب.
• لازم يكون تاريخ كتابة خطاب جهة العمل قبل موعد دخولك السفارة بـ 3 أو 4 أيام بس.

في النهاية أحب أقول تاني ع السريع كدا، لو سمحت بلاش ورق متفبرك، بلاش ورق مالوش أساس، أفهم كويس أوي أنك لا قدر الله لو اترفضت هتبقي دفعت فلوس ورق ومصاريف سفارة وترجمة ورق، غير تعبك رايح جاي، وطبعاً نفسيتك لما تلاقي نفسك عملت حاجات كتير وفالآخر النتيجة عكسية، دا غير أن الرفض في الحالة دي هيبقي مؤذي ليك جداً وهتتعرف أنك شخص مالوش مصداقية.

وأوعي حد يقولك ممكن تقدم تاني وتالت، فعلاً وعاشر كمان بس لو ورقك مظبوط، وفيه ناس تقولك غير شوية بيانات وحروف في اسمك وغير الباسبور كله وأعمل ورق من أول وجديد، تروح قايله علي طول تبدل معايا صوابع إيدي العشرة علشان تبقي غيرت بصمتك بالمرة (الورق والبيانات مش هي اللي بتعرف دايرة معلومات الكمبيوتر في السفارات، لكن بصمة حضرتك).

أصدقائي الأعزاء نتمني نكون شرحنا الموضوع بشكل كافي، ونتمني للجميع النجاح والتوفيق بإذن الله، وبنرحب بكل استفساراتكم وأسئلتكم طول الوقت ... انتظروا كل جديد.