إزاي نعمل كشف حساب بنكي محترم نقدمه لأي سفارة أجنبية؟؟
أصدقائي الأعزاء أهلا بيكم مع Mr Traveler، وكل يوم معلومات جديدة عن السفر للدول الأجنبية خطوة بخطوة وأهم التفاصيل اللي لازم ناخد بالنا منها مهما كانت صغيرة علشان بتفرق كتير في تعاملك مع السفارات.
هنتكلم في موضوعنا اليوم عن تجنب تقديم كشف حساب بنكي مزور أو وهمي للسفارات، وإزاي نعمل كشف حساب بنكي مختوم وموثق كويس ومقبول وبطريقة صحيحة 100%.
وعايزين نقول أن فيه ناس كتير بتقدم ورق محترم وممتاز سواء لسفارة شنجن أو الولايات المتحدة الأمريكية أو كندا أو إنجلترا وللأسف يلاقو نفسهم مرفوضين ومش عارفين السبب الحقيقي إيه، لأن ورق الرفض اللي بتديهولك أي سفارة مش هو السبب الحقيقي ابدا للرفض، ولكنه سبب من الأسباب.
اتكلمنا الموضوع السابق عن أول خطوة وهي (إزاي تعمل مهنة مناسبة وقوية علي جواز السفر)، ودا كان أول خطوة مهمة جداً علشان تظبط ورقك وملفك صح وطبعاً مش محتاجين نقول تاني أهمية أننا نبتدي صح جدا علشان نضمن أعلي نسب نجاح بإن الله.
موضوعنا اليوم هيبقي تاني خطوة في مشوار تجهيز ورقك للسفر، وتاني أهم خطوة بعد ما عرفنا إزاى يبقي عندنا وظيفة محترمة علي بطاقة الرقم القومي وجواز السفر، وطبعاً المهن اللي اتكلمنا عليها هنعرف أهميتها وارتباطها مع كشف الحساب البنكي، لأن كل الخطوات لازم تكون مترابطة جداً جداً، ومفيهاش ثغرات تخلي السفارة لا قدر الله ترفض الشخص اللي بيقدم.
من خلال متابعتنا الدائمة لشروط سفارات الدول الأجنبية لإعطاء الفيزا للمتقدمين، ومن خلال البيانات والإحصاءات علي كل الشباب اللي بيقدم ورقه للسفارات، كان أهم 6 حاجات ملفتة للنظر، ويعتبروا أقوي وأهم أسباب الرفض:
- 90 % من الشباب والأشخاص اللي بيقدمو علي فيزا شنجن أو المملكة المتحدة أو تركيا أو كندا وغيرها من الدول كانوا بيقدمو كشوفات حساب مزورة، آه والله مزورة.
- لما الموظف المختص يجي يقارن ورق إثبات الوظيفة (سواء كانت سجل تجاري وبطاقة ضريبية أو وظيفة وبرنت تأمينا وخطاب جهة عمل)، بيلاقو مفيش صلة بين الوظيفة والراتب المحدد في خطاب جهة العمل وبين المبالغ اللي ليها سحب وإيداع في كشف الحساب البنكي (لو وظيفة لدي صاحب عمل).
- كل الورق اللي بيتقدم لأي سفارة أجنبية بيبقي لسة طازة يعني الواحد بيبقي مخلص إجراءات مهنة ومخلص الورق المبدئي وجري علي مكتب سفريات أو شركة سياحية أو شخص شغال مندوب سفريات بيعمل ورق ويخلي الناس تقدم وخلاص ويا تاخد التأشيرة بالصدفة يا متاخدش، والغالبية العظمى مبياخدوش التأشيرة لأن الإجراءات مش سليمة ولا مترابطة ولا منسقة.
- تلاقي واحد عامل ورق مهنته أنه تاجر وممكن يكون عامل رأس مال كبير (بس علشان السفر)، وتيجي تبص علي كشف حسابه تلاقيه مبلغ مينفعش حتى يفتح بقالة صغيرة.
- السفارات اللي بيبقي فيها مقابلات زي سفارة الولايات المتحدة الأمريكية وقنصلية إسبانيا بالأسكندرية وغيرهم لما بيجي يسأل الشخص عن بياناته أو عن نوع نشاطه يلاقيه بيجاوب بصعوبة أو مش عارف يرد أو بيرد غلط فبيعرف الموظف علطول أن كل الأوراق اللي موجودة في الملف مصطنعة (يعني حد عاملها ليك). ودا برضه من الأسباب القوية اللي تخليك تعمل ورقك خطوة بخطوة.
- مفيش مخطط سياحي، يعني برنامج سياحي ليك في البلد بالأنشطة والأماكن إللي المفروض أنت عايز تسافر البلد علشان تشوفها.
يعني الموظف يجي يشوف الورق اللي انت مقدمه يلاقيك موظف مثلا مندوب مبيعات أو مدير مشتريات أو أياً كانت الوظيفة اللي أنت داخل بيها السفارة، ويجي يشوف خطاب جهة العمل يلاقيك مثلاً متعين بقالك سنة وبتقبض راتب 5000 جنيه (طبعاً ما هو اللي عاملك الورق كاتبلك أرقام كبيرة وضاحك عليك صح وأنت فرحان ومبهور بالأرقام ومش فاهم حقيقة الموضوع) وكل دا غير أنك بتاخد عمولة من الشركة ( علي أساس أن موظف السفارة دا أفندي وأجنبي وهينبهر بالأرقام والورق الملون اللي أنت مقدمه وهيديك التأشيرة أول ما يشوف ورقك)، مش صح طبعاً، كل الأرقام اللي بتنكتب في خطاب جهة العمل والراتب والعمولة كل دا شيءK ولما الموظف يجي يبص في كشف الحساب بتاعك يلاقي دنيا تانية خالص وأرقام ملهاش علاقة باللي فات (عايز أقولك أن الموظف من أول نظرة بيعرف أن كشف الحساب بتاعك متفبرك ومضروب يا ناصح، لا وكمان الأرقام فيه يا إما فلكية يا إما مبالغ بيها وملهاش علاقة بوظيفتك ولا بالراتب اللي أنت أصلا كاتبه).
عايز اقولك الموظفين بيصعب عليهم نفسهم جداً من اللي بيشوفوه وإصرار الناس اللي عايزة تسافر علي تقديم أوراق مزورة وكمان مش مترتبة ولا متنسقة في المعلومات اليي فيها، فأول قرار بياخدوه أنهم يرفضوك ببساطة، وبيبقو متأكدين أنهم خدو حقهم منك وأنك هتتصدم من قرار الرفض (ما أنت صارف ومكلف والنهاية هتمشي فاضي).
ناس كتير بتقول هيعرف إزاى، وناس تقول دا مش بيكشفو علي الورق، وناس تقول دا كشف الحساب البنكي متأيف ومعمول صح هو مزور ومش حقيقي صحيح لكن معمول صح ومحاسب هو اللي عامله، وغيره وغيره من الكلام اللي بيقوله أصحاب المكاتب للأسف هما والمندوبين اللي بيروجو للسفر بطريقة غلط خالص.
لا طبعاً، دا موظف السفارة بيبقي قاعد يشرب قهوته عادي خالص وبيفنط ورقك فدقايق معدودة، لأنه متدرب كويس أوي يبص علي أيه فالورق وإزاي يعمل مقارنة سريعة بين كل الأرقام الموجودة في ملفك، لا وكمان مش موظف واحد اللي بيشوف ورقك زي ما بعض الناس مفكرة، لا دا بيبقي أكتر من موظف، دا غير لما بيتعرض الملف علي القنصل بيبقاله نظرة، صحيح مش بيراجع كل الملف لأن أعداد الناس كتيرة ولأن فيه موظفين قبله راجعو وكتبو في كل ملف تقرير بيلخص وضع الشخص، لكن برضه بيبص علي حاجات معينة بخبرته.
طيب كل دا معناه إيه؟ الموضوع صعب ولا لا؟ نقدر نعمل ورق صح مفيهوش غلطة؟ نقدر نخلي ورقنا سليم ونعمله بنفسنا من غير ما نروح لحد؟ وإزاي نقدر نوصل لأفضل نتيجة؟
الموضوع مش صعب بس محتاج فهم سليم للموضوع ومجهود وتركيز قوي علشان نقدر نوصل للنتيجة المطلوبة ويبقي ملفك جاهز لأي سفارة أجنبية.
كل اللي عليك أنك تتابع كويس أوي كل كلمة وتمشي علي الخطوات اللي هنقول عليها وتبدأ بنفس البداية اللي قولنا عليها فالمقالة السابقة (إزاي تعمل مهنة قوية ومناسبة)، وأنا سايب الرابط فوق. ولسة فيه مقالات تانية كتير بخصوص كل دولة وإزاي تفهم المطلوب للسفارة اللي أنت عايز تاخد تأشيرتها.
بإختصار معانا بإذن الله هتلاقي كل الإجابات لأسئلتك وكل الحلول الصحيحة الممكنة لأفضل نسبة نجاح وتكامل لملفك. كمان هنقدر نديك معلومات عن إيه هي البلاد اللي ممكن تسافر ليها وتعمل إقامة شرعي وتقدر تلاقي فرصتك فيها. السفر مش بس لدول الشنجن ولا الولايات المتحدة الأمريكية ولا كندا، مش بس الدول دي اللي ممكن تحقق فيها حلمك، كمان فيه خطوات تقدر تعملها وبلاد تقدر تسافرها بإمكانيات قليلة وتعمل إقامة سليمة وكمان تلاقي فرصة عمل كويسة مناسبة ودخل مناسب كبداية وتبقي خطوة لسفرك إحدى الدول العظمي اللي نفسك تعيش فيها.
معلومات لازم تعرفها كويس أوي:
- كشف الحساب البنكي قوته وقيمته مش في الأرقام والمبالغ الكبيرة في الحساب زي ما كتير من الناس مفكرة. دي فكرة غلط تماماً ملهاش أي أساس من الصح.
- مفيش حاجة اسمها إن فيه بنك معين مفضل عن غيره قدام السفارة، دا كلام غير منطقي.
- حركات السحب والإيداع في كشف الحساب البنكي مش بس الفلوس اللي بتسحبها وترجع تحطها تاني سواء كل يوم أو كل كام يوم (هنتكلم عنها بالتفصيل فنفس المقالة).
- بيانات الوظيفة اللي مكتوبة في الباسبور علشان السفر لازم تكون هي نفس المهنة اللي موجودة في بياناتك في البنك. فيه ناس بيبقي عندها رصيد فالبنك حتى لو كان فاضي بقاله فترة، وتيجي فكرة السفر فدماغه فيعمل الورق ويجهز مهنة وينسي يعدل المهنة في بيانات البنك. لو مغير المهنة فالبطاقة عن اللي كنت فاتح بيها الحساب البنكي روح وحدث بياناتك لأن دي مهمة أوي.
- أوعي تقدم كشف حساب مزور أو ملعوب فيه أبداً لأن الطرق دي بقت مكشوفة ومعروفة أوي مش زي الأول كانت أوقات تدخل علي موظف السفارة (وكمان دا كان في أضيق الحدود مش علطول).
- اللي يقولك هعملك كشف حساب نضيف وزي الأصلي ومختوم بختم البنك والكلام دا كله قوله شكراً مش عايز وانفد بجلدك لا تروح فداهية وتلاقي السفارة مسلماك للحكومة زي ما بيحصل مع ناس كتير الفترة الأخيرة.
- اللي يقولك روح أفتح حساب في أي بنك وهات الرقم وأحنا نعملك كشف حساب عليه، ويفهمك أن السفارة مش بتستعلم غير عن رقم الحساب، قوله شوفلك شغلانة تانية.
- موظفي السفارات عندهم كزا طريقة يكتشفو بيها كشف الحساب البنكي إذا كان مزور ولا لا، وفيه منهم بيعرفه بالنظرة.
- فيه موظفين عندهم خبرة عالية جداً في أنهم يعرفو كشف الحساب المزور من أول نظرة.
- الناس اللي بتعمل كشف حساب مزور ويقدمه للسفارة، مبيبقاش عارف أن فيه موظف مختص في مواضيع كشف الحساب والموظف دا بيبقي عنده نموذج إلكتروني لأختام جميع بنوك مصر، دا غير إمضاء كل موظف مسئول عن اصدار كشف الحساب البنكي (طبعاً أنت أو غيرك بتعمل كشف الحساب عند شخص ما أو مكتب ما تيجي تمسكه فإيدك تلاقيه شكله حلو ومقنع في حين أنه بيبقي مكشوف جداً لموظفي السفارة.
- معظم السفارات بيتصلو بالبنك مباشرة ويبعتو نسخة من كشف الحساب البنكي اللي أنت مقدمه وبياخد عليه قبول (يعني سليم وبتاعك فعلاً)، أو ياخد رفض عليه (يعني الكشف ممكن يكون رقم الحساب صح وأنت فاتح حساب فعلاً بالرقم دا بس معندكش حركات السحب والإيداع اللي موجودة في الكشف اللي أنت مقدمه للسفارة)، ودي كارثة خلو بالكم منها.
- فيه بعض سفارات بتطلب منك تمضي علي تفويض أنهم يستعلمو عن كشف حسابك زي ألمانيا مثلاً، هتبقي فموقف صعب جداً لو أنت مقدم كشف حساب مزور.
- مش صعب ولا مستحيل أبداً أنك تعمل كشف حساب سليم وتوصل لهدفك بدون مشاكل ولا اشتغالات ولا تعقيدات، بس خلي عندك صبر، مش أول ما تطلع فدماغك فكرة السفر عايز تجري علي أي حد يعملك أي ورق بأي طريقة وخلاص. أنت الخسران مش حد تاني.
لو كان المقال طويل عليك أو ممل في التفاصيل شوية، لازم تكمل قراءة الموضوع هتستفاد كويس إنشاء الله، إحنا بنحاول نقولك كل التفاصيل اللي تهم كل الناس، حتى لو فيه حاجات انت عارفها هتلاقي حاجات فالمقال أنت متعرفهاش خالص ولا حد قالهالك قبل كدا.
دلوقتي تعالوا نعرف إزاي هنعمل كشف حساب محترم، شيك ومناسب لكل السفارت ويكون متناسق وفي سياق المهنة اللي علي جواز سفرك:
- لو أنت لسة معندكش مهنة علي بطاقة الرقم القومي وجواز السفر، تقدر تروح أي بنك وتفتح حساب (توفير)، طبعاً البنوك دلوقت لازم يكون ليك شغل أو مهنة تثبت أن ليك دخل علشان تقدر تفتح حساب جاري، وهو دا نوع الحساب اللي بتطلبه السفارات، وبعدها تقدر تفتح حساب تاني فنفس البنك ويكون (حساب جاري) بعد ما تظبط ورق المهنة بتاعتك وتضيفها علي بطاقة الرقم القومي وجواز السفر، وهتعمل تحديث لبيانات الوظيفة.
- طبعاً هتستفاد هنا بالخطوة دي أنك بتكسب كل الوقت اللي بيعدي عليك وأنت عندك حساب في البنك، وكمان لما تقدم كشف حساب للسفارة هيبقي عندك واحد توفير وواحد جاري (فيه نظام دلوقت في البنوك بيتيح ليك نظام التوفير والجاري وفيزا مشتريات أونلاين كان فنظام واحد)، ومتنساش تخلي الموظف أو الموظفة اللي في البنك يكتبلك رقم الحساب بتاعك علي ورقة وسجله علي موبايلك لأنك هتحتاجه كتير (رقم الحساب البنكي مش الرقم الطويل اللي بيبقي علي بطاقة الفيزا كارد اللي بتستلمها).
- خلي بالك أوعي تحط مبالغ كبيرة مرة واحدة هتبقي كدا بتبوظ كشف الحساب بتاعك نهائي.
- خليك ماشي خطوة خطوة كدا بتركيز وتأني وصبر، والله هتعمل كشف حساب فوق الممتاز.
- ركز فالخطوة دي كويس أوي، كل واحد بيفكر في السفر برة مصر بيبقي معاه فلوس تكاليف السفر أو علي الأقل جزء كويس منها، هتروح تحط جزء منهم وأنت بتفتح حساب بنكي (أبدأ بـعشرة آلاف جنيه مثلاً مينفعش تحط المبلغ كله مرة واحدة).
- بعد كدا أول كل شهر (أول أسبوع في الشهر)، هتحط حوالي 2800 جنيه بصفة مستمرة كل أول أسبوع فالشهر (المبلغ دا بيتماشي مع كل أنواع المهن اللي ذكرناها قبل كدا، لأن أي موظف في البداية بيكون مرتبه أقل من كدا، طبعاً في خطاب جهة العمل اللي هتقدمه بعد كدا هيكون مثلاً مذكور فيه أنك شغال من سنة فاتت أو سنتين فالمرتب دا هيبقي طبيعي وغير مبالغ فيه دا غير أنك هتبقي كاتب في خطاب جهة العمل أن بيطلعلك عمولة بيع بجانب الراتب وليكن 0.5 نص %).
- طبعاً دا مبلغ مش كفاية أنك تعمل كشف حساب محترم، بس دي أول خطوة.
- تاني خطوة هتقدر كل كام يوم تحط نسب متفاوتة ومبالغ قليلة، وحاول تكون المبالغ دي فيها كسور متنكنش مبالغ مقفولة (أنت ابتديت بعشرة آلاف جنيه متسحبش منهم مليم واحد أنت هتزود عليهم كل يومين تلاتة كدا).
- كل المبالغ اللي اتكلمنا عليها دي بسيطة وسهلة آهى لغاية دلوقت، وميزتها كمان أنك مش هتقف في طوابير البنك وتضطر تضيع وقت وتنتظر دور، تقدر تعمل إيداع وسحب من ماكينة البنك.
- كل ما تحط مبلغ حاول تسحب جزء فنفس اليوم وليكن مثلاً عملت إيداع انهاردة بـ 2500 جنيه، اسحب 800 جنيه باليل.
- مش شرط كل مرة تحط فيها فلوس تسحب في نفس اليوم، لا عادي ممكن تسحب فنفس اليوم مرة، وترجع بعد يومين تحط مبلغ تاني زي 1850 جنيه ومتسحبش حاجة فنفس اليوم، وتاني يوم أرجع اسحب مبلغ 4000 جنيه مثلاً، وهكذا.
- طبعاً علشان تكون جاهز لأنك تسافر أي دولة في الدنيا لازم هتكون عامل حسابك علي مبلغ مش أقل من 30.000 جنيه (دا أقل مبلغ خالص).
- طيب أحنا لغاية دلوقت علي سبيل المثال قولنا هنفتح حساب بعشرة آلاف جنيه، وهنفضل نحرك شوية مبالغ صغيرة في حدود أربعة أو خمسة آلاف جنيه، يتبقي من مبلغ ثلاثين ألف اللي معاك (الأرقام تقريبية علي سبيل المثال)، هيتبقي معاك حوالي 15.000 جنيه كمان.
- هتفضل تحرك فيهم سحب وإيداع بنفس الطريقة البسيطة اللي قولناها ومبالغ صغيرة طول الوقت ولمدة مش أقل من ثلاثة أشهر.
- فيه ناس هتقول مبلغ 30.000 جنيه ميكفيش والسفارات بتعوز مبالغ أكتر من كدا في كشف الحساب البنكي علشان تغطي نفقات السفر والمصاريف بتاعتك من سكن ومواصلات وفسح وأكل وشوية هدايا (علي اعتبار أن بتبقي مقدم أنك مسافر سياحة) ... هنقولك الحل المناسب في آخر المقال.
- طبعاً مع تكرار عمليات السحب والإيداع بالطريقة دي هيجي عليك وقت تلاقي نفسك حطيت المبلغ اللي معاك كله (إحنا افترضنا أنك معاك 30.000 جنيه بس).
- اللي معاه مبالغ أكبر طبعاً هيكبر المبلغ اللي بيحطه في البداية لما بيفتح حساب بنكي، وأكيد بيكبر شوية مبالغ السحب والإيداع بس مش بنسب كبيرة برضه.
- طيب أنت دلوقت حطيت المبلغ الصغير اللي معاك كله مع الوقت، لازم تستمر في السحب والإيداع.
- ضروري جداً تطلع فيزا مشتريات، دي هتساعد كتير أوي أوي في نظام السحب والإيداع، هقولك إزاي:
- أنا شخصياً وأصحابي لما سافرنا برة مصر لاقينا أن كل الأشخاص بلا استثناء مش بيشيلو فلوس كاش في جيبهم إلا مبالغ صغيرة خالص، وكل تعاملاتهم المادية بالفيزا كارد، اتعلمنا منهم الحركة دي وخصوصاً أن انتشر في مصر الفترة الأخيرة أنظمة دفع الكترونية كتيرة أوي تسهل عليك أنك متمشيش ومعاك مبلغ كبير لدرجة أن فيه ناس دلوقت بقو يشترو علبة السجاير والحاجة الساقعة بأنظمة دفع الكترونية.
- طيب هتستخدم الفيزا دي إزاي، اقولك:
- لو أنت متجوز مثلاً، أنت أو مراتك أكيد بتروحو هيبر ماركت أو ماركت كبير تتسوقو حاجة البيت بصفة أسبوعية مثلاً، بدل ما تدفع كاش أدفع بالفيزا، هتلاقي نفسك بتعمل مشتريات مثلاً لاحتياجات البيت مش أقل من 3 مرات في الشهر، يبقي أنت كدا معاك 3 مرات عملية سحب ممتازة، حتى لو مش متجوز تقدر تقترح علي والدك أو والدتك أو الشخص اللي بيشتري حاجة البيت أنك تنزل معاه وتدفع بالفيزا.
- كل الشباب دلوقت بيتقابلو في كافيهات بصفة شبه يومية، ومع أنظمة الدفع الالكتروني هتلاقي معظم الكافيهات بتقبل الدفع الالكتروني، بقي عندك عدد محترم من عمليات السحب (بس دا طبعاً ميغنيش عن عمليات السحب اللي اتفقنا عليها)، طبق الموضوع دا علي كل حاجة بتشتريها قدر الإمكان.
- لو أنت عندك أي نوع من وسائل الدفع الالكتروني دي قبل ما تقرأ المقال دا، هتفيدك برضه احتفظ بكل وصولات الدفع وبتترفق مع كشف حساب البنك، لأنها بتدل علي فلوس أنت صرفتها بالفعل يعني كانت معاك.
- كل حاجة بتبيعها أو بتشتريها حاول تحتفظ بوصولات الدفع بتاعتها أو عقود البيع والشراء، كل دا بينفع (أي حاجة بتدل علي أن بتبيع أو تشتري أو بتدفع أو بتمتلك حاجة بتترفق مع كشف الحساب وبتكون مساعد قوي جداً ليك مالياً).
- لو عندك عربية أو حد من أسرتك معاه عربية حتى ولو صغيرة، خليه يبيعهالك بيع وشراء وسجل ورقها باسمك (دا يثبت أن معاك مبلغ مالي غير اللي موجود في البنك غير وصولات البيع والشراء اللي قولنا عليها، وكمان بيدل أنك راجل ليك وضع اجتماعي كويس ومترتب وواخد وضعك).
- برضه نفس الكلام لو بيت أو شقة ملك، ممكن تحولها باسمك أو علي الأقل ممكن والدك أو والدتك يكتبوك شريك فيها (كل ورقة هتقدمها تثبت ملكيتك لحاجة بتساوي فلوس حتى ولو قليلة بتخلي موقفك قوي جداً مع كشف الحساب.
- طيب كل الأفكار دي كويسة بس برضه لسة كشف الحساب الرئيسي مفيهوش مبلغ كبير. نقولك علي شوية حلول كويسة وتقدر تعملها:
أفكار تساعدك تكبر المبلغ اللي معاك علشان تعمل كشف حساب بأرقام كويسة مع الوقت:
- أكيد عندك والدك أو والدتك بيشتغلوا (دا إن مكنش الاتنين بيشتغلوا)، هتتفق معاهم كل قبض مرتب أنهم يحطو المبلغ دا فحسابك عن طريق ماكينة البنك وابقي اسحبه فنفس اليوم باليل عادي أو تاني يوم، يبقي أنت كدا بقي معاك مصدر فلوس كويس.
- برضه لو ليك أخ أو أخت بيشتغلوا كرر نفس الموضوع.
- أكيد ليك أقارب أو معارف يثقو فيك وقريبين منك ومصادر دخلهم هتختلف من شخص للتاني، كرر نفس الموضوع معاهم (خلي بالك أوعي تنسي أنك تسحب وتودع الفلوس بمبالغ مناسبة مش كبيرة).
- متنساش أنك لو مشيت بالترتيب اللي قولناه دا وفهمته كويس هتبقي مركز معانا دلوقت أن أنت كدا حطيت الفلوس اللي أنت بتمتلكها كلها مع الوقت وبتسحب وبتودع فيهم، يبقي اللي أنت هتستعين بيهم اللي قولنا عليهم في الـ3 خطوات اللي فاتوا مبالغهم اللي هيحطوها فحسابك لمدة يوم أو يومين عالأكتر، دي كدا فلوس ومبالغ فوق الـ 30.000 جنيه اللي افترضنا أنك مش معاك غيرهم.
- خلي بالك من نقطة مهمة، بعد ما يعدي 3 شهور علي كل اللي عملناه دا، هتفضل برضه محافظ علي المبلغ اللي بتحطه أول كل شهر(اللي هو المفروض الراتب بتاعك)، وكمان تقدر تزود المبالغ اللي بتحطها فحسابك شوية بشوية.
- معظم أهلنا بيعملوا جمعيات طول الوقت، خلي والدك أو والدتك يتفقوا مع حد من اللي بيعمل جمعيات أنه يدخل فلوس فحسابك بس مبالغ صغيرة (مثلاً من 3.000 جنيه فيما فوق حسب الإمكانية)، بس الكلام دا بعد 3 شهور علشان يتحسبولك فوق المبلغ الرئيسي بتاعك.
- أكيد ليك صديق قريب منك ساعدوا بعض واستفيدوا مع بعض وطبقوا الكلام اللي فات دا وحولوا فلوس لبعض واستفيدوا من المبلغ اللي معاكو انتو الاتنين.
- نقطة مهمة أوي أوي، وأنت بتعمل عمليات إيداع حاول تخلي حد من القريبين منك هما اللي يحطوها فحسابك، هتفرق كتييييييييييير أوووووي معاك، ومش هيبان في كشف الحساب بتاعك مين اللي حول ليك فلوس أو حط فلوس في حسابك لأنها بتظهر علي هيئة أرقام وبس، يعني مش هيبان أن قرايبك أو أهلك هما اللي بيعملوا كدا.
- كمان تقدر تخلي أصحابك وقرايبك اللي بتثق فيهم يعملوا نفس الحركة، كدا يا باشا أنت باشا فعلاً وهيبان للسفارة اللي هتقدم فيها أن دي عمولات وحوالات من زباين وشغل عالي إنشاء الله، ومجهوده قليل.
- خلي بالك كويس أوي بقي من النقطة دي وهتفهمك إزاي كشف الحساب بيتعرف أنه قوي ولا ضعيف من إيه، أي سفارة بتبص علي إجمالي حركة السحب والإيداع، ودي حاجة ناس كتير متعرفهاش، طيب يعني إيه؟؟ يعني مثلاً ممكن يكون كل الفلوس اللي معاك والفلوس اللي بتجيبها بالطرق اللي قولنا عليها بيبقي فيه خانة في كشف الحساب بتبين إجمالي المبالغ اللي دخلت وخرجت من كشف الحساب البنكي بتاعك، ودا هو أهم نقطة.
يعني السفارة لما بتبص علي كشف الحساب مش مهم يكون المبلغ اللي النهائي اللي أنت حطه كبير، لكن مهم جداً جداً جداً بالنسبالهم إجمالي حركات السحب والإيداع اللي في كشف حسابك البنكي.
علشان كدا بنقول أن قوة وفعالية كشف الحساب مش بوجود مبلغ كبير فيه لكن بإجمالي حركات السحب والإيداع. وبالطرق اللي فاتت دي يبقي معاك كشف حساب محترم ومنسق ومقبول، مفيهوش الغلطات اللي تخلي السفارة تستبعدك لا قدر الله من الحصول علي التأشيرة.
الموضوع مش صعب، كل اللي عليك بعد ما تستعين بالله تركز وتفهم الخطوات المطلوبة منك وتشوف إيه أنسب الحلول ليك، ولازم لازم تكون صبور جداً ي صديقي علشان توصل لهدفك بإذن الله وتكون عملت اللي عليك.
أصدقائي الأعزاء نتمني نكون وفينا أكبر قدر ممكن من المعلومات والأفكار والاقتراحات وحل بعض المشاكل المتعلقة بكشف الحساب البنكي، وبنرحب دايماً باستفساراتكم وأسئلتكم طول الوقت. وانتظروا المزيد من الموضوعات.
ليست هناك تعليقات:
إرسال تعليق