الدليل السياحي وخريطة لمعظم أشهر الأماكن السياحية في مدينة برشلونة
أصدقائي الأعزاء ... هنعمل دليل سياحي لأكتر الدول إللي الشباب بيحبو يقدمو علي تأشيرتها علشان يدخلو منطقة الشنجن (الإتحاد الأوروبي) عن طريق السياحة.
طبعاً مفهوم أن كل الأماكن والشرح إللي يخصها مش فارق معاك، ومش مهتم بالكلام دا، لكن وأنت بتجهز ورقك علشان تقدم للسفارة لازم تبقي تصرفاتك وورقك كله بيدل أنك سائح فعلاً، علشان كدا لازم يبقي معاك مخطط أو دليل سياحي لتحركاتك داخل البلد، وكمان لو أتسألت ولو بالصدفة عن اي مكان تبقي فاهم ومعلوماتك كويسة.
علشان كدا قررنا أن نقدملك المعلومات كاملة وأنت تختار، أفضل من أننا نقدم برامج سياحية كاملة لما تيجي تحملها من علي الموقع تلاقي ناس كتير عاملين زيك وتبقو متشابهين في البرنامج السياحي لأن المصدر واحد.
لكن أنت طور وفكر ورتب المعلومات إللي بنقدمها بطريقتك وأسلوبك الخاص، بطريقة سهلة جداً، وكمان تقدر تدخل علي النت تكتب أسم كل مكان أخترته وتاخد صورة كويسة للمكان وتحطها تحت أسم المكان في البرنامج بتاعك (دا لو عملت المخطط السياحي بنفسك بدون اللجوء لموقع أو لشخص). وكمان تقدر تلاقي عنوان المكان وخريطة صغيرة ليه تقدر تدمجهم في المخطط بتاعك، ويبقي أنت كدا عامل شغلك بنفسك وفاهم كل مرحلة فيه ومستعد لإجابة أي سؤال يتعلق بمخطط الرحلة.
مدينة برشلونة:
هنتكلم عن معظم الأماكن السياحية والأماكن العامة إللي بتكون مزار للسياح
من كل مكان، وكمان أشهر الشواطئ إللي بتجذب السياح فترة الصيف بالأخص.
1- (Camp Nou):
استاد يتسع كان أرض ملعب برشلونة منذ عام 1957، وفيه قرابة 100.000 مقعد.
مكان كبير جداً ويستحق الزيارة وخصوصاً لعشاق كرة القدم الإسبانية.
2- (Plaça de
Catalunya):
ساحة كبيرة في وسط مدينة برشلونة وتعتبر مركز المدينة، وهو من أكتر الأماكن شعبية في مدينة برشلونة مع وجود نافورات مياه بأشكال فنية، وساحة تجمع للحمام وكمان مكان مثالي للتسوق.
3- (Gràcia):
منطقة عالمية ومشهورة جداً في مدينة برشلونة، وهتلاقي في المكان دا أرقي
محلات الماركات العالمية المشهورة والفنادق الراقية، والكافيهات هناك هتلاقي فيها
فنانين وموسيقيين. ولو هتكون هناك في الصيف هتلاقي سكان المنطقة طول الوقت بيزينو
ويجملو الشوارع والمباني بطريقة جميلة.
4- (Fundació Joan
Miró):
متحف للفن الحديث، والمكان دا كان مركز لدراسات الفن المعاصر
وفيه قاعة محاضرات كبيرة، والمبني كله تحفة فنية بيزورها كتير من السياح وبالأخص
المهتمين بالمعارض إللي بتتعمل من وقت للتاني.
5- (Palau de la Música Catalana):
قصر الموسيقي الكتالونية مصنف في التراث الإسباني، وهو مكان لإقامة حفلات
الأوبرا والموسيقي الشعبية، ومن الأماكن الموجودة في أكتر البرامج السياحية لمدينة
برشلونة لأن عدد الأشخاص إللي بيحضرو حفلاته الموسيقية تقريباً مليون شخص كل سنة .
6- (Barcelona
City History Museum):
هو متحف مدينة برشلونة التاريخي، بيحتوي علي تقارير ودراسات ووثائق تاريخ
برشلونة من بداية نشأتها وتطورها للوقت الحالي. وفيه بعض المواقع الأثرية
الرومانية وطريق أسمه "الجنازة" ومعبد أغسطس، باختصار تقدر تشوف تاريخ
برشلونة الأثري كله هناك بمساحة حوالي 4000 متر مربع
7- سوق Boquería
أكتر الأسواق شهرة في مدينة برشلونة، وهو سوق لكل الأطعمة المشهورة في
مدينة برشلونة وإسبانيا عموماً، والسياح بيتصورو هناك مع أكشاك الطعام المشهورة،
وبيفضل المكان زحمة من أول ما يفتح في الصباح الباكر وحتى آخر اليوم.
8- (Sagrada
Família):
كنيسة "العائلة المقدسة"، ويعتبر أكبر مبني كنسي في العالم، وهي
كنيسة كاثوليكية رومانية من أضخم كنائس أوروبا عموماً.
وتم ضم هذا المبني لقائمة "كنوز إسبانيا"، وهو مبني قائم في
بنائه علي مزيج من الأساليب المعمارية المتنوعة ولا يشبه أي موقع اثري ديني علي
مستوى العالم.
9- (Las
Ramblas):
شارع يتوسط مدينة برشلونة، طوله يتعدي الكيلو متر ومصدر زيارات الإسبان
والسياح عامة، مليان كافيهات ومطاعم ومحلات ومشهور بمقاهي الرصيف، والشارع كله
أشجار من علي الجانبين بمشهد جمالي طبيعي ممتاز.
ينتشر الأسواق المحلية بالقرب من شارع "لا رامبلا"، وملئ
بالفنانين الشعبيين ، كمان هتلاقي ميناء المدينة وشاطئ بالقرب من الشارع.
10- (Park Güell):
عبارة عن مكان ضخم بيحتوى علي مجموعة حدائق بمناظر طبيعية خلابة رائعة،
وفيها نظام معمارى أثري ومتطور علي مستوي منطقة المنتزه. وبالنسبة للسياح وأهل البلد،
دا أفضل مكان ياخدو فيه صور تذكارية جبارة في وسط الطبيعة والمعمار، دا غير الهدوء
الخيالي وسط الطبيعة.
نيجي بقي علي الترفيه والمصايف في أجمل شواطئ مدينة برشلونة وإسبانيا
عموماً.
1- Barceloneta
Beach
يقع شاطئ لا برشلونيتا على ساحل الحي الشهير الذي يشتهر باسمه ، وهو أكثر
مناطق برشلونة إزدحاماً، ومن مميزاتها أن الشاطئ دا فيه مطاعم كتير للمأكولات
البحرية الطازة. وهتلاقي رياضات مائية مختلفة، يعني مش مجرد شاطئ فقط.
2- Nova
Icaria Beach
بيمتد لمساحة 400 كم
من الشواطئ الرملية والبحر، ويعتبر الشاطئ الأكثر هدوء في برشلونة، علشان كدا هو
الشاطئ المفضل بالنسبة للعائلات والأشخاص إللي بيحبو الهدوء. ومليان برضه مطاعم
وبارات، وفيه أماكن أعاب وترفيه للكبار والصغار.
3- Ocata
Beach
شمال برشلونة وعلى بعد نصف ساعة فقط بالقطار من المدينة، شاطئ أوكاتا نقي
وهادئ ومشهور بالرمل الأبيض الذهبي الجميل، ويعتبر من الأماكن المخصصة بالأكتر
للعائلات.
4- Bogatell
Beach
بيتميز هذا الشاطئ بالهدوء وأعلى درجات الحماية والأمان، وبيشتهر بزيارة
كبار السن ولعب الكرة الطائرة وكرة الطاولة.
5- Sant
Sebastia
هذا الشاطئ هو الأقرب إلى الطرف الشرقي من برشلونة ويمتد لأكثر من كيلومتر
، وهو من أطول الشواطئ في برشلونة. الشاطئ دا من الأماكن المحببة لسكان البلد
والسياح لأنه فيه خدمات كتير تخليه مفتوح طول اليوم، يعني مش مجرد شاطئ بالنهار
وبس.
أصدقائي الأعزاء نتمني نكون أتكلمنا بالتفصيل عن كل ما يخص موضوع مقالتنا، وأكيد بننتظر تفاعلكم وتعليقاتكم، واي أسئلة تحبو نجاوب عليها، أكتبو لنا في التعليقات وإنشاء الله نفيدكم.
وكمان لو أنت واقف معاك حاجة في ملفك ومحتاج تطمن أن خطواتك صح راسلنا وأحنا نقولك النصايح إللي ممكن تكمل عليها إنشاء الله.
وبنأكد كمان أن أي مساعدة مننا ليك مجاناً تماماً، ومساعدتنا هي عبارة عن تعليق أو اكتشاف ثغرة في ورقك إلي آخرة من أنواع المساعدة إللي بتعتمد علي التوجيه لا أكثر.
أقرأ أيضاً:
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
- الأوراق المطلوبة للتقديم لسفارة شنجن، وتكملة الحجوزات اللازمة.
- طرق السفر إلي أوروبا بالنسبة للمصريين وأهمية الدعوة السياحية أو البرنامج السياحي وكيفية الحصول عليه.
- أسباب رفض الحصول علي تأشيرة دولة أجنبية، وبعض الحلول العملية لتجنب الرفض.
- طريقة حجز ميعاد سفارة إيطاليا بالقاهرة والإسكندرية.
- خطوات ملء أبلكيشن سفارة إيطاليا بالتفصيل.
- حجز ميعاد سفارة إسبانيا بالقاهرة والإسكندرية.
- خطوات ملء أبلكيشن سفارة إسبانيا بالتفصيل.
- الدليل السياحي لمدينة مدريد - إسبانيا.
ليست هناك تعليقات:
إرسال تعليق