طريقة تعبئة استمارة أو نموذج أو أبلكيشن فيزا إيطاليا
أصدقائي الأعزاء ... نفس النموذج أو الاستمارة دي بيمشي مع معظم السفارات الشنجن، علشان كدا ركزوا معانا في كل خطوة، علشان تقدروا تعملوا أبلكيشن بنفسكم خطوة بخطوة من غير ما تحتاجوا تدفعو فلوس لأي حد. وكمان تبقوا فاهمين كل بيانات الأبلكيشن.
استمارة الأبلكيشن مكتوب فيها البيانات باللغة الإنجليزية (رابط تحميل الأبلكيشن "أضغط هنا"، هتنزل لتحت هتلاقي خانة تحميل أضغط السهم وأختار سادس أختيار إللي هو "Tourist Visa-Schengen Application Form").
بعد ما تحمل الأبلكيشن علي الكمبيوتر، هنفتح الأستمارة ونبتدي البيانات بالترتيب. هتلاقي كل خانة مترقمة بالترتيب ومعناها بالعربي تحتها. البيانات كلها إللي هنملء بيها الأبلكيشن هتكون باللغة الإنجليزية، ونخلي بالنا من كل كلمة وحرف بنكتبه، وبياناتك كلها تنقلها من الباسبور بالظبط وتراجع عليها.
ملء الأبلكيشن حسب الترتيب:-
- اللقب (الأسم الأخير)، يعني رابع أو خامس أسم عندك في الباسبور.
- هتسيب الخانة دي فاضية.
- هتكتب أسمك.
- تاريخ الميلاد ويكون الفاصل العلامة دي (/)، علشان الأبلكيشن يقبلها.
- المدينة إللي اتولدت فيها.
- بلد الميلاد (Egypt).
- الجنسية (Egyptian).
- هتحدد الجنس (ذكر - أنثي).
- هتعلم في المربع الخاص بالحالة الاجتماعية ليك، سواء متزوج أو مطلق أو خاطب.
- دا لو أنت أقل من 18 سنة بيتكتب أسم الواصي وجنسيته.
- رقم بطاقة الرقم القومي كاملة.
- هتختار خانة جواز سفر عادي.
- رقم جواز السفر، ودا هتلاقيه بيبتدي بحرف (A).
- تاريخ صدور جواز السفر.
- تاريخ إنتهاء جواز السفر.
- الخانة بتاعة (صادر من)، هتلاقي رقم في باسبورك في خانة مكان الإصدار هتكتبه بيبقي مكون من رقمين فقط.
- رقم موبايلك (هو دا إللي هيجيلك عليه رسالة لما تسلم ورقك، ورسالة علشان تستلم جواز سفرك).
- الإجابة هتبقي (لا)، إلا إذا كان معاك إقامة لأي دولة بتضغط علي (yes)، وتكتب نوع الإقامة وبدايتها وتاريخ إنتهاءها.
- هتكتب المسمي الوظيفي بتاعك (هتلاقيه في الباسبور باللغة الإنجليزية أنقله).
- هتكتب في الخانة دي أسم الشركة إللي أنت شغال فيها وعنوانها ورقم تليفون للعمل. ولو كنت طالب هتكتب أسم المدرسة والعنوان وتليفون المدرسة برضه.
- هتضغط علي خانة الغرض من الزيارة سواء كانت سياحة أو عمل أو بزنس أو دراسة، إلي آخره.
- هتكتب طبعاً إيطاليا (Italy).
- هتكتب إيطاليا.
- بيسألك أنت عايز الفيزا دخول مرة واحدة ولا كزا مرة، الصح أنك تختار كزا مرة (Multipli) متعددة يعني.
- هتذكر عدد الأيام إللي هتقضيها في إيطاليا.
- هتختار لا، أما لو كنت حصلت قبل كدا علي تأشيرة شنجن هتكتب (نعم)، وكانت بتاريخ امتي صدورها.
- هتختار (لا).
- هتسيبها فاضية.
- هتكتب تاريخ الذهاب.
- هتكتب تاريخ العودة.
- هتكتب أسم الفندق أو المكان إللي هتسكن فيه مدة رحلتك. ولو حد باعتلك دعوة هتكتب أسمه الأول والأخير، غير كدا زي ما أنت اسم الفندق. الخانة إللي بعدها مش مترقمة هتكتب فيها عنوان الفندق أو السكن والبريد الإلكتروني للمكان دا. الخانة إللي بعدها رقم تليفون مكان السكن والفاكس.
- الخانة دي خاصة بالدعوة البزنس بتكتب اسم الشركة إللي باعتالك الدعوة وعنوانها. الخانة إللي بعدها رقم تليفون الشركة والفاكس. لو أنت رايح سياحة هتسيبها فاضية.
- مين هيتكفل بمصاريف الرحلة كاملة، هتختار خانة (طالب التأشيرة)، لو غير كدا شوف بقي المسمي إللي يتناسب مع حالتك.
- بيانات أقارب أو معارف في إيطاليا أو أوروبا عموماً (طبعاً لو أنت عندك حد هناك متقولش)، هتسيبها فاضية يا سيدي الفاضل.
- نفس الكلام سيبها فاضية.
- هتكتب (Egypt)، وتضغط انتر من الكيبورد وتكتب تاريخ اليوم إللي أنت بتملي فيه الأبلكيشن.
- لو الشخص أقل من 18 سنة، الخانة دي مخصصة لإمضاء ولي الأمر.
خلصنا الأبلكيشن ... بسيط وسهل مش كدا؟؟ لكن في نفس الوقت لازم تراجع بياناتك كزا مرة علشان تتأكد أن مفيش غلطة. والشطارة في ملء الأبلكيشن دايماً خانات المواعيد الخاصة بالذهاب والعودة، والخانات إللي المفروض تتملي في حالة لو معاك دعوة من شخص أو شركة.
نأكد علي شوية معلومات بسيطة:-
- برنامج أو مخطط الرحلة السياحية مهم جداً جداً جداً (أتكلمنا نعمله إزاي قبل كدا).
- من المنطقي جداً أنك تعمل مخطط أو برنامج سياحي لمدينتين داخل الدولة، مينفعش تكتفي بمدينة واحدة (شرحناها برضه قبل كدا).
- كشف الحساب البنكي مش شرط يبقي فيه مبلغ كبير زي ما ناس كتير مفكرة، ممكن تدخل السفارة وأنت كشف الحساب بتاعك 40 ألف جنيه وأقل شوية، الفكرة في قوة كشف الحساب زي ما قولنا قبل كدا أن إجمالي حركات السحب والإيداع تكون بمبلغ كبير ومحترم (لو مش واضحة ليك أقرأ الموضوع إللي أتكلمنا فيه عن كشف الحساب).
- مينفعش تعمل حجز فندق مبالغ فيه من ناحية السعر، أختار حاجة حنينة خالص وعلي الأد، أنت رايح تتفسح وتستمتع مش تقعد في غرف فخمة في فنادق (والسفارة فاهمة دا كويس).
- سواء كان ليك مقابلة أومفيش لازم تاخد بالك لو أتسألت عن نيتك لزيارة دلوة تانية غير إيطاليا، طبعاً جوابك يكون (لا)،
- هو مفيش مقابلات شخصية في مكتب تقديمات إيطاليا صحيح، لكن دا ميمنعش أنهم بيسألوا وبيدققو بعض الأوقات فلازم تكون عامل حسابك.
- اليوم إللي المفروض هتركب فيه الطيارة وراجع مصر، أنت مبتبقاش حاطط أي مخطط أو مكان تزوره اليوم دا، يعني هتطلع من الفندق علي المطار طوالي.
- اليوم إللي قبله حاول يكون يوم خفيف وأكتره تسوق لشراء هدايا تذكارية (كل دا بيبقي مكتوب في البرنامج السياحي).
- هنقول تاني متستهونش بالبرنامج السياحي وبكل التفاصيل إللي فيه، لأنه بيتراجع كويس أوي في السفارة.
- اليوم إللي هتروح فيه السفارة تكون هادي ومرتب نفسك بدون أي تكليف أو مبالغة في المظهر، وتكون أبتسامة خفيفة علي ملامحك حتى لو الموظفين مش عاجبينك أو أسلوبهم ناشف.
- خلي ورق حجز الفندق والطيران والبرنامج السياحي وورقة التأمين الصحي الدولي وكشف الحساب البنكي وجواز سفرك، خليهم أول ورق ولوحدهم بالترتيب زي ما كتبتهم كدا.
- باقي ورقك خليه في ظرف أو دوسيه تاني.
- أصل الأوراق أفصله عن صور الأوراق.
بكدا أصدقائي الأعزاء نكون شرحنا كل خانة في الأبلكيشن وإزاي تملاه بكل سهولة ومن غير تعقيد ولا مصاريف كتير، وموفقين إنشاء الله.
شارك معانا بتعليقك وأتفاعل معانا برأيك، ولو عايز نتكلم عن موضوع معين أنت مهتم بيه في مجال السفر ومش موجود علي صفحتنا، أبعتلنا تعليقك وهنهتم جداً بتنفيذ كل إللي يهمكم.
أقرأ أيضاً:-
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
- الأوراق المطلوبة للتقديم لسفارة شنجن، وتكملة الحجوزات اللازمة.
- طرق السفر إلي أوروبا بالنسبة للمصريين وأهمية الدعوة السياحية أو البرنامج السياحي وكيفية الحصول عليه.
- أسباب رفض الحصول علي تأشيرة دولة أجنبية، وبعض الحلول العملية لتجنب الرفض.
- طريقة حجز ميعاد سفارة إيطاليا بالقاهرة والإسكندرية.
ليست هناك تعليقات:
إرسال تعليق