أشهر الأماكن السياحية في مدينة مدريد - إسبانيا
أصدقائي الأعزاء ... هنعمل دليل سياحي لأكتر الدول إللي الشباب بيحبو يقدمو علي تأشيرتها علشان يدخلو منطقة الشنجن (الإتحاد الأوروبي) عن طريق السياحة.
طبعاً مفهوم أن كل الأماكن والشرح إللي يخصها مش فارق معاك، ومش مهتم بالكلام دا، لكن وأنت بتجهز ورقك علشان تقدم للسفارة لازم تبقي تصرفاتك وورقك كله بيدل أنك سائح فعلاً، علشان كدا لازم يبقي معاك مخطط أو دليل سياحي لتحركاتك داخل البلد، وكمان لو أتسألت ولو بالصدفة عن اي مكان تبقي فاهم ومعلوماتك كويسة.
وخلي بالك أن الأهم كمان من أسئلة السفارة (قولنا قبل كدا أن قنصلية إسكندرية فيها مقابلة شخصية وأسئلة في كل ما يخص رحلتك)، لما ربنا يكرمك وتاخد التأشيرة، لازم لازم هيبقي معاك تاني الدليل السياحي إللي أنت أصلاً واخد التأشيرة علي أساسه، فأكيد هتتسأل في المطار عن المكان إللي هتسكن فيه وغرض الزيارة، ولما يعرف أنك سياحة هيحاول يعرف منك شوية عن معلوماتك بخصوص السياحة والأماكن السياحية في البلد.
علشان كدا، الدليل دا هيساعدك كتير إنشاء الله في تخطيط رحلتك وعمل مخطط سياحي لكل مدينة جوة الدولة إللي عايز تقدم علي تأشيرتها. وطبعاً هنقدم قدر الإمكان الأماكن ومعلومات عامة عنها، وليه السياح بينجذبو للأماكن دي، وأنت كل إللي عليك تقرأ كل مقالة كويسة، وتختار من 3 - 5 أماكن تحطهم في المخطط السياحي بتاعك.
علشان كدا قررنا أن نقدملك المعلومات كاملة وأنت تختار، أفضل من أننا نقدم برامج سياحية كاملة لما تيجي تحملها من علي الموقع تلاقي ناس كتير عاملين زيك وتبقو متشابهين في البرنامج السياحي لأن المصدر واحد.
لكن أنت طور وفكر ورتب المعلومات إللي بنقدمها بطريقتك وأسلوبك الخاص، بطريقة سهلة جداً، وكمان تقدر تدخل علي النت تكتب أسم كل مكان أخترته وتاخد صورة كويسة للمكان وتحطها تحت أسم المكان في البرنامج بتاعك (دا لو عملت المخطط السياحي بنفسك بدون اللجوء لموقع أو لشخص). وكمان تقدر تلاقي عنوان المكان وخريطة صغيرة ليه تقدر تدمجهم في المخطط بتاعك، ويبقي أنت كدا عامل شغلك بنفسك وفاهم كل مرحلة فيه ومستعد لإجابة أي سؤال يتعلق بمخطط الرحلة.
وكل بلد سياحي إنشاء الله هنخصص له مواضيع تتكلم عن كل مدينة سياحية داخل الدولة، وأهم الأماكن في المدن دي علشان يبقي معاك دليل قوي يوفر عليك البحث.
مدريد
هي عاصمة دولة إسبانيا، وتحتل المركز الرابع من
حيث أكبر المدن الأوروبية بعد (باريس – لندن – برلين)، ورابع مدينة في أوروبا من
حيث عدد السياح، وتحتل المركز الأول في السياحة علي مستوي إسبانيا نفسها. وتعتبر
مقر العائلة المالكة والجهات الحكومية الرسمية، وفيها 6 جامعات حكومية، دا غير
المعاهد العليا والخاصة، وهتلاقي فيها مقر أهم الشركات في إسبانيا. كمان هي مقر
الحومة الإسبانية والوزارات والبرلمان الإسباني.
وأهم ما يميزها المساحات الخضراء والحدائق
المنتشرة في أنحاء المدينة، وكمان المتاحف ونظام العمارة المتميز فيها، يعني تمشي
في شوارعها تلاقيها مميزة في كل شيء.
أشهر المعالم السياحية في مدريد:
1- متحف الآثار الوطني:
من تأسيس الملكة إيزابيلا الثانية عام 1867، ويضم
مجموعة غنية من القطع الأثرية من عصور ما قبل التاريخ إلى القرن التاسع عشر،
وبيتعرض فيه آثار رومانية ومصرية وإسلامية.
2- متحف برادو:
والمتحف دا عبارة عن 3 أدوار فيهم 100 غرفة يعني متحف
بمستوي عالمي بمعني الكلمة، وفيه أكتر من 5000 لوحة لدرجة أنها بتنافس مجموعة
اللوفر في باريس. ومجموعة اللوحات دي بتضم: اللوحات الإيطالية والفلمنكية
والفرنسية والبريطانية والألمانية وكذلك المنحوتات الإيطالية الكلاسيكية الجديدة.
3- القصر الملكي:
تحفة فنية تستحق أنها تبقي مكان سياحي من روعة
التماثيل وتنسيق الرسومات في كل مكان، دا غير أن مكان القصر مرتفع وتقدر تشوف
مساحات خضراء وحدائق لأبعد مدى.
وفيها غرفة أسمها (غرفة العرش)، ودي بتستخدمها
الدولة باستمرار في الحفلات لأن كل ركن فيها قطعة فنية وديكور خيالي. والقصر كمان
فيه غرف كتير مفتوحة للجمهور والتصوير حتى غرف الأسلحة.
4- قلب المدينة (بويرتا ديل سول):
تم تسمية Puerta
del Sol على
اسم شعار الشمس على بوابة المدينة القديمة، ومن أكتر الأماكن حيوية من ناحية
المحلات والكافيهات والمطاعم، وفيها مكان من أكبر المتاجر اللي بتبيع كل شيء،
وهناك مركز محطات النقل بمختلف أشكاله.
5- ساحة بلازا مايور:
المكان دا يعتبر أشهر مكان للتجمع في مدريد،
لأن فيه مطاعم وكافيهات ومراكز تسوق، وليها تاريخ سابق في مصارعة الثيران وعروض
السيرك.
6- حديقة بوين ريتيرو:
الحديقة دي مميزة جداً في مدريد، وعلي مساحة
واسعة، وتم تخصيصها وإنشاؤها في القرن السابع عشر، وتلاقيها أكتر الوقت فيها زوار
من كل مكان بيستمتعو بالمناظر الطبيعية والهدوء، وفيها بركة مياه، وهتلاقي كافيهات
وسط الطبيعة، وفيها مرصد نجوم قديم من عام 1790.
7- معبد ديبود: معبد مصري قديم
ودي مفاجأة، هو فعلاً معبد مصري، مصر أهدته
لإسبانيا عام 1968 علشان كان ليها دور كبير في إنقاذ معابد أبو سمبل بمدينة أسوان
في التوقيت إللي أتبني فيه السد.
وأكيد دا من المعالم السياحية الأكثر تمييز في
مدريد، ودا مكانه في منتزه La Montaña (بالقرب من Plaza
de España).
8- (متحف الفن المعاصر) Centro de Arte de Reina:
المكان دا بيعتبر تحفة فنية ومركز متقدم للفنون
الحديثة بمساحة 39 ألف متر مربع، وقامت الملكة صوفيا بافتتاحه سنة 1986، وفيه 3
أبراج من الزجاج بأسانسير، وفيها حديقة ليها تركيبة مميزة من كل أشكال الفنون
والتماثيل، وفيه مكتبة وكافيه ومطعم.
9- متحف تيسين بورنيميزا (متحف الفنون الجميلة):
المتحف فيه حوالي 1000 عمل فني بيقدم متحف تفاصيل
عامة عن الفن الأوروبي من القرن الثالث عشر إلى أواخر القرن العشرين، وبيعرض كمان
مجموعة ممتازة من اللوحات الأمريكية في القرن التاسع عشر.
10- سيبيليس ونافورة جران فيا:
ودي بتنسب للفن الرمزي، وشرحها ببساطة أنها تجسيد
للآلهة الرومانية في عربة بيجرها أسد، والمكان دا مشهور جداً في مدريد لأنه فيه
معالم كتير بتهم السياح زي المركز الثقافي والحفلات الموسيقية. وكمان فيها أكتر من
مسرح فنون وأوبرا، وبيسموه الشارع الذي لا ينام.
11- ملعب سانتياغو برنابيو (ملعب ريال مدريد):
بالنسبة للشباب إللي مهتم بكرة القدم دا مكان غني
عن التعريف، وناس كتير بيروحو يتصورو هناك في كل مكان في الملعب حتى غرف الملابس.
12- متحف لازارو جالديانو (Lázaro Galdiano):
بيضم مجموعة كبيرة من حوالي 9000 عمل فني معروض
في 30 غرفة. المجموعة دي متنوعة من الدروع والعملات المعدنية والميداليات إلى المجوهرات
والكريستال والمفروشات.
13- متحف سورولا:
المتحف دا بيعرض أعمال فنان إسباني مشهور إسمه
خواكين سورولا.
14- بويرتا دي الكالا
قوس النصر النيو كلاسيكي الكبير بتكليف من الملك
كارلوس الثالث للاحتفال بوصول الملوك إلى العاصمة الإسبانية. ارتفاعه حوالي 30 متر،
وليه بوابة بمدخل جرانيت خيال، واجهة المكان مزخرفة بمنحوتات ، وعواصم ، ونقوش زخرفيه.
15- حديقة حيوان (Aquarium de Madrid):
السياح بيروحو مخصوص علشان عروض الدولفين
والباندا.
16- سوق سان ميغيل:
السوق دا من مميزاته أنه بيفتح لوقت متأخر من
الليل وناس كتير بتروح تسهر وتاكل وتتفسح وتسمع موسيقي ومكانه مميز في Mercado de San Miguel على مسافة قريبة من Plaza Mayor ، والمكان عبارة
عن محلات ليها زخرفة وعمارة ممتازة، وهتلاقي سلع كتير تقدر تشوفها من خلال واجهة
زجاجية.
وطبعاً أتكلمنا قبل كدا عن إزاي تختار الفندق
أو الغرفة بتاعتك في شقة سكنية في مقال سابق (الروابط أسفل المقالة)، ويبقي كدا
أنت معاك دليل سياحي كامل لمدينة مدريد.
نصائح وجولات: كيفية الاستفادة القصوى من زيارتك إلى مدريد
لو عايز تشوف أفضل مناطق الجذب في المدينة من غير متاهة التنقل حول المدينة:
- رحلة مدريد كومبو لمدة أربع ساعات: مشاهدة معالم المدينة وجولة متحف برادو أكتر الجولات شعبية في المدينة، وهتتمتع بجولة لمدة ثلاث ساعات حول المدينة في أتوبيس مكيف، وتعرف حاجات كتير عن ثقافة مدريد وتاريخها.
- لو عايز تتنقل بحرية وسهولة في المكان اختار جولة "مدريد هوب أون هوب أوف" (هتلاقي البرنامج بتاعها في كل مكان)، أو يوم كامل أو تذكرة لمدة يومين للصعود والنزول في زيادة عن 30 محطة توقف على طريقين مختلفين. وهتقدر تشوف كل معالم المكان زي القصر الملكي وسان فرانسيسكو إل غراندي وبلازا مايور وبويرتا ديل سول وبرادو والمتاحف الفنية الأخرى في باسيو ديل برادو.
- وكمان فيه جولات مشهورة جداً بالدراجات وبتاخد خوذة أمان وبيبقي معاك دليل بيتكلم اللغة الإنجليزية، وبتبقي مدتها مثلاً من ساعة لساعتين.
- ممكن تعمل جولة نهرية تشوف من خلالها: مدن والمناظر الجميلة المحيطة بمدريد، وهتبقي قاعد مسترخي في مكان مكيف مش شاغل بالك بحاجة غير المناظر الجميلة حواليك، وهتلاقي الجولات النهرية دي بتسمح بالتوقف وزيارة الأماكن إللي تستاهل تنزل تشوفها وفيه منها أماكن بتذاكر دخول (أسعار رمزية)، وفيه أماكن مجانية. الرحلة النهرية دي بيكون فيها أماكن زي (أفيلا وسيغوفيا) ليوم كامل وهي مدن مدرجة في قائمة التراث العالمي ومدخل كنيسة سان فيسنتي في أفيلا وألكازار في سيغوفيا.
- رحلة توليدو لنصف يوم أو ليوم كامل، حيث يمكنك الاستمتاع بالروائع من El Greco والتجول في شوارع المدينة التي تعود للقرون الوسطى. الجولات دي تشمل المشي وسط مرشدين سياحيين (يعني مش هتغلب).
أصدقائي الأعزاء نتمني نكون أتكلمنا بالتفصيل عن كل ما يخص موضوع مقالتنا، وأكيد بننتظر تفاعلكم وتعليقاتكم، واي أسئلة تحبو نجاوب عليها، أكتبو لنا في التعليقات وإنشاء الله نفيدكم.
وكمان لو أنت واقف معاك حاجة في ملفك ومحتاج تطمن أن خطواتك صح راسلنا وأحنا نقولك النصايح إللي ممكن تكمل عليها إنشاء الله.
وبنأكد كمان أن أي مساعدة مننا ليك مجاناً تماماً، ومساعدتنا هي عبارة عن تعليق أو اكتشاف ثغرة في ورقك إلي آخرة من أنواع المساعدة إللي بتعتمد علي التوجيه لا أكثر.
أقرأ أيضاً:
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
- الأوراق المطلوبة للتقديم لسفارة شنجن، وتكملة الحجوزات اللازمة.
- طرق السفر إلي أوروبا بالنسبة للمصريين وأهمية الدعوة السياحية أو البرنامج السياحي وكيفية الحصول عليه.
- أسباب رفض الحصول علي تأشيرة دولة أجنبية، وبعض الحلول العملية لتجنب الرفض.
- طريقة حجز ميعاد سفارة إيطاليا بالقاهرة والإسكندرية.
- خطوات ملء أبلكيشن سفارة إيطاليا بالتفصيل.
- حجز ميعاد سفارة إسبانيا بالقاهرة والإسكندرية.
- خطوات ملء أبلكيشن سفارة إسبانيا بالتفصيل.
ليست هناك تعليقات:
إرسال تعليق