السفر للخارج خطوة بخطوة

ازاي تعمل مهنة أو وظيفة مناسبة للسفر للخارج ؟؟

تغيير المهنة في جواز السفر المميكن والتعرف علي الأوراق المطلوبة لاستخراج جواز سفر بمهنة قوية ومناسبة للسفر:-

أصدقائي الأعزاء .. كتير من الشباب بيدور علي فرصة للسفر خارج مصر سواء بعقود عمل لدول عربية أو أجنبية (أوروبا "شنجن"، الولايات المتحدة الأمريكية، كندا، وغيرها)، علشان كدا صفحتنا دي إنشاء الله هتكون عن كل المعلومات اللي ممكن يحتاجها أي شخص عايز يسافر، وكمان هنشرح خطوة بخطوة إجراءات السفر بتمشي إزاى وإزاي تبدأ تجهيز للحصول علي التأشيرة علشان تسافر، وإنشاء الله هتلاقي كتير من المعلومات تفيدك في السفر.

تجهيز الأوراق الخاصة بالسفر إلي دولة من دول الاتحاد الأوروبي "شنجن" أو الولايات المتحدة الأمريكية أو كندا أو أي دولة أجنبية أخرى، شروطها الأساسية:-

أول حاجة بتنطلب هي (خطاب من جهة العمل "HR" - مفردات مرتب)، دا في حالة لو موظف حكومة، ولو صاحب نشاط أو مشروع هينطلب منك (سجل تجاري - بطاقة ضريبية). وكمان بينطلب كشف حساب بنكي لمدة لا تقل عن ثلاثة أشهر سابقة من إيداع وسحب ولازم يكون فيه مبلغ معين حسب كل دولة. وطبعا فيه أوراق تانية بس المهنة وكشف الحساب أهم أهم ورق. وهنركز فالمقالة الأولي علي المهنة وإزاي تعمل وظيفة محترمة علي جواز السفر بكل التفاصيل.

طبعاً لازم تاخد بالك كويس أوي أن الوظيفة علي جواز السفر أول وأهم نقطة في ملف السفر بتاعك، لأن جواز السفر هو بطاقة تعريف للشخص عند السفارة وكل ما الوظيفة كانت كويسة، كل ما يبقي وضع ملفك كويس، لأن لو مفيش مهنة يبقي حضرتك عاطل وعايز تروح بلدهم تشتغل مش سياحة زي ما بيبقي الملف متجهز، وهنشرح بالتفصيل إزاي نتجنب كل دا.

أولاً: إزاي اختار وظيفة مناسبة تمشي مع كل سفارات الدول الأجنبية، وإيه أفضل المهن علي جواز السفر:-

عامل السن مهم جدا قبل ما تختار المسمي الوظيفي بتاعك، ناس كتير بتلجأ لأشخاص أو مكاتب ويعملوا مهنة تبان أنها قوية وبتبقي قويىة فعلاً لكن مش مناسبة لسن الشخص، ودي من أهم وأشهر الأسباب اللي بتخلي ملف الشخص مكشوف أوي بالنسبة للسفارة، ويبقي من أولها كدا رفض لا قدر الله بسبب أن الوظيفة مش ملائمة للسن، يعني مثلا الشباب من سن ١٨ سنة لسن ٢٨ سنة تلاقيهم بيعملوا سجل تجاري وأنهم أصحاب نشاط، أو تلاقيهم عاملين وظيفة مدير مبيعات أو مدير مشتريات أو مدير شركة كزا، إلي آخره من المسميات ودا غلط ومش مناسب.

ثانياً: الوظائف والمهن المناسبة حسب الفئة العمرية (السن):

هنتكلم هنا عن شوية وظايف ومهن تمشي مع السن دا وفنفس الوقت مهن قوية جدا ومناسبة، وبعدها هنتكلم عن إزاي تعمل الورق اللى يخليك تضيف المهن دي علي البطاقة الشخصية وجواز السفر (زي التأمينات الاجتماعية وكيفية عمل برنت تأمينات وكيفية التعامل مع مكتب العمل).

** الطريقة الأولي: لو أنت سنك من ١٨ سنة لسن ٢٨ سنة، يبقي أنت محتاج تعمل وظيفة من دول (أخصائي مبيعات - أخصائي مشتريات - مساعد مدير مبيعات - مساعد مدير مشتريات - مصمم جرافيك - مصمم ديكور - مصمم ملابس - مصور فوتوغرافي).

المهن دي أهميتها مش بس أنها ملائمة للسن، هتنفعك كمان وأنت بتعمل حساب للبنك لأانها مهن فلوسها غير محددة وبتعتمد علي العمولات أكتر من الراتب.

** الطريقة الثانية: لو أنت سنك ٢٨ سنة فيما فوق، هنتكلم عن استخراج البطاقة الضريبية للمهن الحرة وكيفية استخراج سجل تجاري وبطاقة ضريبية، ويفضل متعملش النشاط التجاري لوحدك، ممكن تضيف واحد أو اتنين من أصحابك أو واحد صاحبك وأخوك أو ابن عمك أو قريبك (ودي حاجة مفيهاش ضرر ليهم لأنهم مش هيغيرو خانة الوظيفة عندهم أي حد منهم لو هما مش مهتمين بالسفر وينفع تنهي النشاط بعد ما توصل للتأشيرة بإذن الله). وهنعرف دلوقت إزاي نعمل سجل تجاري وبطاقة ضريبية بطريقة شيك.

بالنسبة للطريقة الأولي (المهن اللي بتحتاج خطاب جهة عمل وبرنت تأمينات منسوب لشركة أو أي قطاع خاص):- 

الموضوع بسيط مش صعب وتقدر تعمله بنفسك، هياخد منك شوية مجهود لكن هيبقي أفضل من أنك تدفع فلوس كتير لشخص أو مكتب علشان يعملك مهنة. أعمل خطواتك بنفسك هتفرق معاك كتير وهتحس بطعم النجاح فكل خطوة تخلصها، وهتبقي فاهم الدنيا ماشية ازاي ومعاك ورقك كامل وفاهم كل حاجة فيه (هتحتاج الكلام دا أوي قدام خصوصاً لو هتدخل سفارة بتعمل مقابلة شخصية).

هتشوف أقرب مكتب عمل ليك، وهتسأل اي موظف هناك عن قائمة الوظائف اللي ممكن تختار منها وظيفتك، هتلاقي معظم الحاجات اللي أنا كاتبها فوق ووظايف تانية كتير (أختار المناسب ليك وفكر شوية بعد ما تقرأ الوظايف دي هتلاقي حاجة منهم أكيد أنت مهتم بيها).

بعد ما تختار المهنة اللي أنت شايفها كويسة بالنسبالك، هيقولك الموظف روح أدفع حوالات بريدية بقيمة كذا وباسم كذا (لازم تسأل موظف مكتب العمل الأول لأن الحوالات بتختلف في عددها وقيمتها من محافظة للتانية)، الحوالات البريدية لا تتعدى المائة جنيه ولكن أقل فمتقلقش. 

طبعاً هتسأله علي باقي الورق المطلوب وتكتبه فورقة علشان متنساش اي حاجة وتفضل رايح جاي، والورق دا هيبقي:

1. برنت تأمينات (ودا بتجيبة بالبطاقة الشخصية فقط من أي مكتب تأمينات ولازم تكون مصور البطاقة الشخصية لأنه بيكتبلك الرقم التأميني عليها بعد ما يشوف أصل البطاقة)
2. صورتين شخصيتين (يفضل ٤*٦ خلفية بيضا، كدا كدا لازم يكون معاك صور حديثة علشان الباسبور)
3. هتصور البطاقة الشخصية كزا نسخة وخلي كل الورق دا معاك في دوسيه علشان مفيش حاجة تضيع منك

طبعاً متنساش تصور الحوالات البريدية لأنك هتحتاج النسخ دي، وهتطلع بالورق دا علي مكتب العمل تاني وهتطلب شهادة مزاولة مهنة وتقوله علي المهنة اللي أنت اخترتها. الموظف هيديك استمارة وهيرفق بيها جزء من الأوراق اللي معاك وهيوجهك بعدها لمكان الامتحانات الخاصة بمكتب العمل (ما تخافش حاجة بسيطة وعادية ومحدش بيدقق معاك فحاجة وبتخلص بسرعة لأن الكل بيبقي عارف أنك محتاج المهنة دي للسفر)، ومن هناك هيرجع يوجهك لمكتب العمل التاني هتستلم شهادتك فالميعاد المحدد وغالباً بيبقي يومين أو تلاتة.

يبقي كدا فاضلك اهم حاجة وهي أنك تروح مكتب القوى العاملة ومعاك كل الأوراق اللى أنت عملتها وطبعا متنساش تصور كل ورقة كزا صورة، والمرة دي هتاخد معاك استمارة رقم قومي سواء العادية أو المستعجلة (الموظفين طبعاً بيوجهوك بعد كل خطوة تخلصها يعني مفيش متاهة أحنا بنشرح بالتفصيل علشان تبقي متخيل الموضوع ماشي ازاى والجهات اللي هتتعامل معاها مش أكتر).

هياخدو منك في مكتب القوى العاملة الورق اللى معاك واستمارة بطاقة الرقم القومي وهيختم علي المربع الخاص بخانة المهنة ويبقي أنت كدا هتروح تقدم استمارة بطاقة الرقم القومي وتاخد وصل باستلام البطاقة الجديدة فالميعاد المحدد.

ببالنسبة لخطاب جهة العمل (HR) وبرنت التأمينات، بقي سهل جداً حد معرفة عنده نشاط سواء جار أو قريب أو حتى أي مكتب خدمات يقدر ينسبك لشركة أو مشروع أو نشاط قائم بالفعل وأنت كل اللى بتدفعه تمن التأمينات لمدة ثلاثة شهور فقط + عمولة رمزية للمكتب بالاتفاق.

تقدر تعرف رقمك التأميني من خلال الرابط دا

بالنسبة للطريقة الثانية وهي استخراج سجل تجاري وبطاقة ضريبية:

ببساطة هتعمل عقد إيجار لو معندكش مكان تمليك، وهتروح الشهر العقاري تاخد إثبات تاريخ علي العقد، وبعدها هتاخد وصل كهرباء أو غاز أو مياه حديث معداش عليه ٣ شهور وهتصور بطاقتك ومعاك عقد الإيجار أو التمليك وهتروح مصلحة الضرائب التابع ليها منطقتك وتقدم علي ترخيص نشاط تجاري (مهم أوي تختار اسم شيك يكون علامة تجارية ليك وليكن شركة كزا أو مكتب كزا لتجارة كزا أو نشاط كزا).

هتاخد منهم وصل بعد ما تقدم الورق، والموظف هيديك ميعاد لاستلام البطاقة الضريبية الالكترونية ويوجهك لأقرب غرفة تجارية تابع ليها لاستخراج السجل التجاري.

نقطة مهمة خلي بالك منها كويس وهي قيمة رأس مال المشروع (يفضل جداً تعمل رأس المال خمسين ألف، ودا طبعاً مش هتدفع عليه غير رسوم رمزية وهتعمل رأس المال كبير لأن بعض السفارة السنتين اللي فاتو اشترطو رأس مال عالي بالنسبة للسجل التجاري وكدا كدا أي سجل تجاري جديد مبيبقاش فيه ضرايب يعني هتعمل المهنة بالورق المناسب وبعد ما تحصل علي التأشيرة إنشاء الله تقدر تلغي كل الأوراق دي وتقفل النشاط بدون مشاكل).

في حالة لو عملت السجل التجاري أنت وحد معاك هتحتاج تعمل عقد شراكة ودا هنزله ليكم في التعليقات. وكالعادة كل الخطوات دي هتلاقي الموظفين بيوجهوك صح للأماكن اللي هتسجل فيها والورق المطلوب بسيط.

أفكار تساعدك تعمل سجل تجاري وبطاقة ضريبية:

1. ممكن تعمل عقد شراكة أنت وأي حد من أقاربك أو أصحابك لاستخراج سجل تجاري النشاط فيه هيبقي شركة كزا، وتقدر توزع التسميات الوظيفية زي ما أنت عايز وتبقي أنت مدير الشركة مثلاً.
2. ممكن تشوف حد من أصحابك عايز يسافر وتعملو الفكرة مع بعض وتشتركو في التكاليف هتبقي كويسة جداً ليك.
3. ممكن تعرض علي أي حد عنده نشاط تجارى صغير أنه يدخلك معاه شريك مثلاً وتستغل أن النشاط التجارى دا مر عليه وقت وتفهمه أنك هتتكفل بمصاريف الورق الحكومي (دا لو معندكش مكان تعمله عقد إيجار).
4. مممكن برضه تشترك مع شباب ليهم نفس الرغبة فالسفر وتعرضو علي أي حد عنده نشاط غير مرخص وتعرضو الفكرة عليه وأنكم هتدفعو تكاليف الترخيص هينبسط جدا.
5. لو لقيت واحد أو اتنين معاك عايزين يعملو مهنة هيبقي سهل تأجرو أي مكان حتى لو صغير أوى وهتبقي تكاليفه بسيطة جدا وحاول تشوف المكان دا فالمنطقة بتاعتك علشان تبقي معروف لصاحب المكان ومياخدش منك تأمين، وهيبقي الإيجار لمدة شهر واحد بس ودا مدة كافية جدا لاستخراج السجل التجارى والبطاقة الضريبية.

فيه فكرة جديدة كمان ممكن تطبقها: انتشر من فترة طويلة موضوع التجارة اونلاين فمختلف السلع والمجالات علي كل مواقع التواصل الاجتماعي، وتقدر تستفيد من دا أن مكاتب الغرف التجارية ومكاتب مصلحة الضرائب بيرخصو المشاريع الاونلاين، يعني ممكن تعمل صفحة بزنس علي الفيس بوك مجاناً وتبقي صفحة مخصصة للعمل التجاري وتضيف شوية سلع ولينكات لمواقع بتبيع سلع وأعرضها عندك وضيف اصحابك وقرايبك عليها، وممكن تعمل إعلان ممول بقيمة من ٣٠٠ جنيه مصري مع أي شركة إعلانات ممولة، أو ابحث علي الفيس هتلاقي ناس شاطرة بتعرف تعمل الموضوع دا كويس أوي بتكاليف قليلة عن الشركات هيبقي عندك عدد مشتركين محترم وتروح علي مصلحة الضرائب وترخص بمسمي (تاجر أونلاين) وهتبقي فكرة جديدة وأمشي مع الإجراءات هتلاقيها بسيطة ومش معقدة ومش مكلفة خالص، وزود علي كدا حركة شيك كمان أطبع شوية كروت عليها اسمك واسم الصفحة ورقم أو اتنين تليفون ليك وقدم الكارت الشخصي مع الورق للسفارة (أصحاب الشركات والسجلات التجارية والمندوبين وتقريباً كل الفئات بيعملو كروت تدل علي نشاطهم وبيقدموه فحالة السفر).

دلوقت أصدقائي الكرام نتمني أن يكون الموضوع وافي لكل المعلومات والحلول المناسبة الخاصة بالموضوع، ولو فيه أي استفسار عندك لنقطة مش واضحة أو شرح ناقص أكتب كل استفساراتك في التعليقات وإنشاء الله هنقوم بالرد عليها فأقرب وقت.

وتقدر تراسلنا علي بريد (جيميل): mrtraveler64@gmail.com