طريقة حجز موعد لدي سفارة إسبانيا بالقاهرة و القنصلية العامة بالإسكندرية
أصدقائي الأعزاء ... هنتكلم في موضوع اليوم عن طريقة حجز موعد علي سيستم (BLS) الخاص بسفارة إسبانيا بالقاهرة. وإزاى نحجز ميعاد في القنصلية العامة بالإسكندرية لأنها بتتبع نظام مختلف في حجز المواعيد.
وهنتكلم عن أشهر الأسئلة في مقابلة قنصلية إسبانيا بالإسكندرية، وأشهر أسباب السفارة لرفض حصولك علي التأشيرة.
خلي بالك:
حجز ميعاد سفارة إسبانيا بالقاهرة:
الحجز ببساطة بيتم عن طريق منظمة أو مكتب (BLSSPAINVISA)، (لو عايز تدخل علي الموقع أضغط علي الكلمة داخل القوس، أو خدها نسخ وأدخل علي جوجل وأضغط علي أو أختيار يظهرلك).
المكتب دا يا أصدقائي هو مكتب وسيط بينك وبين السفارة ومخصص لسفارة إسبانيا بالقاهرة. هتدخل علي الموقع الرابط إللي سايبهولك باللغة العربية، هتظهر الصفحة الرئيسية، هتلاقي خانة مكتوب عليها (حجز موعد)، أقف عليها بالماوس هتفتحلك أختيارات، أختار منها (مركز طلبات التأشيرة التابع ل بي ال اس الدولية)، هيفتحلك أختيار كمان أختار أول خانة (أحجز موعداً).
هتنتقل علي صفحة بعنوان (استمارة الحجز)، هتملء البيانات المطلوبة، أول خانة (إذا كنت هتقدم فردي ولا أسرة أضغط علي الدائرة الخاصة بأختيارك)، بعدها المكان (إجباري هو القاهرة مفيش أختيارات تانية)، إللي بعدها خانة فئة التعيين هتختار (Normal)، بعدها رقم التليفون (أكتب رقمك)، بعدها خانة البريد الإلكتروني (لازم يكون بتاعك)، وبعدها أضغط علي مربع (طلب رمز التحقيق).
هيبعتولك كود علي البريد الإلكتروني بتاعك، هتعمل نسخ وتكتبه في آخر خانة إللي هي (رمز التحقق).
هتتنقل علي صفحة تانية، أنزل لتحت شوية، وأضغط علي الزر الأخضر (أوافق)، هتتنقل علي صفحة ملء بياناتك الشخصية، وهي عبارة عن:
- تعيين التاريخ: هتفتح الخانة دي وهتختار الميعاد المناسب ليك لتسليم ملفك في مكتب التقديمات وأخذ بصماتك.
- هتتفتحلك خانة بعد ما تختار الميعاد (وقت الموعد): هتختار الساعة والوقت المناسب ليك في اليوم إللي هتروح فيه السفارة (راعي مدة السكة بينك وبين المكان وخصوصاً لو أنت من محافظة تانية).
- فئة التأشيرة: هتختار أول حاجة (Tourism) سياحة، لو أنت رايح لغرض تاني أختار إللي يناسبك.
- هتكتب في الخانة الرابعة: أسمك (وخلي بالك من كل حرف بتكتبه).
- هتكتب اللقب (أسم العائلة أو الأسم الرابع ليك).
- تاريخ الميلاد.
- رقم تليفونك هتلاقيه مكتوب (راجعه).
- نوع جواز السفر: هتلاقيه مكتوب لوحده (Ordinary Passport)، لو مش مكتوب كدا أختار الكلمتين إللي بين القوس.
- هتكتب رقم جواز سفرك إللي بيبتدي بحرف (A).
- تاريخ إصدار جواز السفر.
- تاريخ إنتهاء صلاحية جواز السفر.
- الخانة دي خاصة برقم في جواز السفر الخاص بيك مكونة من رقمين هتلاقيها في خانة مكان الإصدار.
- بعد كدا هتلاقي خانة أسمها (أختر خدمات القيمة المضافة الأخرى)، هتضغيط بس علي خدمة الرسائل (SMS).
- بعد كدا هتلاقي مربع مكتوب فيه حروف أو حروف وأرقام، أنزل للمستطيل إللي تحته وأكتب الحروف والأرقام زي ما مكتوبة في المربع.
- بعدها أضغط (Submit).
كدا أنت سجلت الصفحة إللي هتطلعلك أحفظها علي جهازك لأنها هتنطبع وترفقها بباقي المستندات بتاعتك.
عنوان سفارة إسبانيا بالقاهرة: 20 شارع جزيرة العرب، المهندسين، الجيزة.
بالنسبة لحجز ميعاد في قنصلية إسبانيا بالإسكندرية:
الحجز مختلف وعايز تركيز، وبيتم عن طريق البريد الإلكتروني بتاعك، تابع خطوة خطوة:
- هتفتح الإيميل بتاعك وتضغط علي كلمة (إنشاء)، ودي علشان تبعت للسفارة رسالة.
- هتفتحلك نافذة أو صفحة صغيرة علي الجنب وأول خانة فيها بعنوان (إلي) يعني الجهة أو البريد الإلكتروني إللي هتبعتله.
- تكتب الإيميل دا (cog.alejandria@maec.es).
- الخانة إللي بعدها، خانة الموضوع مهم تركز في الكلمتين إللي هيتكتبو فيها ومعناهم بالعربي (طلب موعد)، هتكتب فيه (REQUEST APPOINTMENT).
- هتكتب بقي مضمون الرسالة كالآتي:
أكتب البيانات بنفس ترتيبها، أو خدها نسخ ولصق عندك:
هتكتب كأنك بتكتب رقم تليفون كدا من الشمال لليمين.
- Name and Surname: هتكتب قدامها أسمك والأسم الأخير.
- Date of Birth: تاريخ الميلاد.
- Passport Number / Expiration Date: هتكتب رقم الباسبور وتاريخ إنتهاء الباسبور.
- Place of Residence: هتكتب مصر / المحافظة بتاعتك (بالإنجليزي طبعاً هتلاقيهم مكتوبين في الباسبور).
- Phone Number: رقم تليفونك.
- Requested Date: هتكتبله تاريخ اليوم إللي بتبعت فيه الرسالة دي.
- Date of Appointment: هتكتب اليوم إللي عايز يكون فيه المقابلة.
- Date of Travel: هتكتب تواريخ رحلتك الذهاب / العودة.
أكتب الخانة باللغة الإنجليزية زي ما أنا كاتبهالك كدا، وبياناتك طبعاً هتبقي برضه بالإنجليزي زي ما في الباسبور بالظبط.
بعدها هتضغط علي (إرسال)، أو كلمة (Send) علشان تبعت الرسالة، وغالباً الرد بيكون سريع جداً، يعني في نفس اليوم أو تاني يوم بالكتير إنشاء الله.
وطبعاً بتطبع الرسالة إللي هيبعتهوالك بالميعاد علشان تكون معاك في الملف، لأن فيه ناس بتفكر علشان حجزو بالإيميل يبقي خلاص مش محتاجين ياخدو الورقة دي معاهم.
عنوان قنصلية إسبانيا بالإسكندرية: 101 طريق الحرية - باب شرقي وابور المياه - قسم باب شرقي
الأوراق المطلوبة للسفارة:
- استمارة الأبلكيشن مكتوب فيها البيانات باللغة الإنجليزية.
- جواز سفر ساري لمدة 6 شهور قادمة.
- جواز السفر القديم (لو عليه تأشيرة مخالفة أو كنت كاسر فيزا بلاش تقدمه).
- لازم تجيب شهادة تحركات موجهة للسفارة من مجمع التحرير حتى لو كان معاك جواز السفر القديم.
- حجز فندق (بيطلبوه مؤكد، راجع الموضوع إللي أتكلمنا فيه قبل كدا عن طريقة عمل الفندق المؤكد).
- حجز طيران.
- البرنامج السياحي بتاعك.
- وثيقة تأمين صحي دولي محدد بقيمة 30 ألف يورو (قول للشركة إللي هتحجز منها بس وهو هيفهم وتمنها بسيط مش غالي).
- خطاب جهة العمل مذكور فيه الراتب (شرحناه قبل كدا).
- عقد العمل.
- برنت تأمينات أجتماعية.
- السجل التجاري والبطاقة الضريبية (لأصحاب العمل).
- شهادة قيد من المدرسة أو الجامعة (بالنسبة للطلبة).
- لمن هم أقل من 18 سنة: شهادة من الوالدين موثقة في مكتب الشهر العقاري وإقرار منهم بالموافقة علي سفرك. وحضور أحدهم للسفارة للتوقيع علي الأبلكيشن.
- صور شخصية 4*6 خلفية بيضاء (مش شرط 3.5*4.5).
- الورق كله يكون من أصل وصورة.
- خلي ورق الحجوزات والباسبور لوحدهم، والأوراق الخاصة بشغلك لوحدها.
- لو معاك تأشيرة أو أكتر علي الباسبور الجديد أو القديم صورهم وصور أختام الدخول والخروج.
- ترجمة الأوراق إلي اللغة الإسبانية أو الإنجليزية.
أهتم بالحاجات دي كويس وخلي بالك وأنت بتعملها:
- أملء بياناتك بهدوء وتركيز علشان متكتبش حرف غلط.
- بعد ما تخلص ورقك راجعه وراجع بياناته والتواريخ.
- لازم تكون قدام مكتب التقديمات قبل ميعادك علي الأقل بساعة.
- خلي لبسك في العادي بدون تكلف أهم حاجة تكون منظم وملامحك واضحة كويس.
- بعد ما تبصم وتدفع الفلوس بتاخد وصل أوعي تضيعه لأن دا إللي هتستلم بيه.
- أحفظ المخطط أو البرنامج السياحي بتاعك كويس، وكل المواعيد المتعلقة بالرحلة، حتى كمان تبقي عارف أنت حاجز علي طيران إيه.
بكدا أصدقائي الأعزاء نكون شرحنا بالتفصيل طرق حجز المواعيد، وغالبية المعلومات المهمة ليك. وإنشاء الله المقالة الجاية مباشرة نتكلم عن خطوات ملء الأبلكيشن والأخطاء القاتلة إللي بتكون سبب في رفض التأشيرة لا قدر الله.
أقرأ أيضاً:
- إزاي تعمل مهنة مناسبة وقوية علي بطاقة الرقم القومي؟ وإيه أنسب المهن ليك؟
- إزاي تعمل كشف حساب بنكي بنفسك يكون قوي ومفيهوش الغلطات اللي بتخلي ناس كتير تترفض؟
- إزاي تعمل HR (خطاب جهة العمل)؟ وإيه أهم العناصر اللي تكون مذكورة فيه؟
- الأوراق المطلوبة للتقديم لسفارة شنجن، وتكملة الحجوزات اللازمة.
- طرق السفر إلي أوروبا بالنسبة للمصريين وأهمية الدعوة السياحية أو البرنامج السياحي وكيفية الحصول عليه.
- أسباب رفض الحصول علي تأشيرة دولة أجنبية، وبعض الحلول العملية لتجنب الرفض.
- طريقة حجز ميعاد سفارة إيطاليا بالقاهرة والإسكندرية.
- خطوات ملء أبلكيشن سفارة إيطاليا بالتفصيل.
السلام عليكم ورحمة
ردحذفلو سمحت عايز اعمل اليعاد موفرة الان ول لا
ي ريتم ردكم وشكرا لكم جميعا
ردحذفهل لديكم حجز الميعاد متوفرة حاليا
ردحذف